आज दिउसो चिनियाँ कम्पनी अलिबाबा ग्रुपका मालिक तथा चिनियाँ व्यवसायी ज्याक मा नेपाल भ्रमणका लागि काठमाडौं ओर्लिएका छन् ।

हङकङको जेट एभिएसन बिजनेस जेटको बोइङ ७३७ म्याक्स चार्टर्ड जहाजमा उनी मंगलबार दिउँसो काठमाडौंस्थित त्रिभुवन अन्तर्राष्ट्रिय विमानस्थलमा अवतरण गरेको अध्यागमनका अधिकारीले जानकारी दिएका छन् ।

बंगलादेशको ढाकाबाट काठमाडौं आएका उनको जेटमा ६ जना चालक दलका सदस्य रहेको नागरिक उड्डयन प्राधिकरणका सहप्रवक्ता ज्ञानेन्द्र भुलले जानकारी दिए । उनको भ्रमणको उद्देश्यबारे यकिन विवरण सार्वजनिक नगरिएको भए पनि ज्याक मा बिजनेस ट्रिपका लागि काठमाडौं आएको बताईन्छ ।

यही जुन २९ तारिख बिहीबार उनी काठमाडौंबाट पाकिस्तानको लाहोर जाने तालिका छ ।

बालुवाटारको ललिता निवास जग्गा प्रकरणमा अख्तियारले जोगाएका आरोपितहरुमाथि पनि प्रहरीले अनुसन्धान सुरु गरेको छ ।

ललिता निवासको सरकारी जग्गा व्यक्तिको नाममा नामसारी गर्ने क्रममा छ जग्गा नै घुस लिएर आफन्तको नाममा राखेकाहरुलाई प्रहरीको केन्द्रीय अनुसन्धान व्यूरो (सीआईबी)ले अनुसन्धानको दायरामा ल्याएको हो । त्यसक्रममा पूर्वनिर्वाचन आयुक्त सुधीरकुमार शाह पक्राउ परेका छन् ।

शाह गृह मन्त्रालयमा लामो समय बसेका पूर्वसहसचिव हुन् । सरकारी सेवाबाट अवकाश पाएपछि उनलाई सरकारले निर्वाचन आयुक्त बनाएको थियो । ललिता निवासको सरकारी जग्गा व्यक्तिको नाममा नामसारी गरेको अनियमिततामा उनले घुसबापत पाएको जग्गा आफन्तको नाममा राखेको आरोप छ ।

सीआईबी स्रोतका अनुसार ललिता निवासको व्यक्तिको नाममा लगिएका बेला शाह भक्तपुर मालपोत कार्यालयमा शाखा अधिकृत थिए । सरकारले अधिग्रहण गरिसकेको ललिता निवासको जग्गा पुनः सुवर्णशमशेर र उनको परिवारको नाममा फर्काएर भूमाफियाले अनियमितता गरेका थिए ।

राणा परिवारसँगको नाता पनि पर्ने सुधीरकुमार शाहले ललिता निवासको जग्गा व्यक्तिको नाममा फर्काउँदा पर्दा पछाडिबाट सहयोग गरेको सीआईबी स्रोत बताउँछ । उनले भुसवापत पाएको १ रोपनी ११ आना जग्गा पत्नी उर्मिलाको नाममा राखेको स्रोतको दाबी छ ।

प्रहरीले जग्गा घुस खाएको आरोप लागेका गृहका पूर्वसहसचिव गेहनाथ भण्डारीलाई पनि खोजिरहेको छ ।

त्यतिबेला शाखा अधिकृत रहेका भण्डारीले सरकारी जग्गा राणा परिवारको नाममा फिर्ता गराइदिन भूमिका खेलबापत पाएका जग्गा सासु सोदाकुमारी चापागाईको नाममा १० आना र पत्नी भुवनकुमार चापागाईँको नाममा एक रोपनी जग्गा राखेको स्रोतको दाबी छ ।

अख्तियार दुरुपयोग अनुसन्धान आयोगले चार वर्षअघि सुधीरकी पत्नी उर्मिला र गेहनाथको पत्नी भुवनकुमारी र सासु सोदाकुमारीलाई मुद्दा चलाए पनि दुई पूर्वसहसचिवलाई भने मुद्दा चलाएन । त्यो बेला गृह प्रशासनबाटै अख्तियारमा पुगेका नविनकुमार घिमिरे अख्तियारमा प्रमुख आयुक्त थिए ।

गेहनाथकी सासु सोदाकुमारीले चार वर्षअघि अख्तियारमा बयानका क्रममा आफूलाई छोरीले बोलाएर जग्गा दिएको बताएकी थिइन् । ‘छोरीले मलाई बोलाएर जग्गा किन्नुपर्ने भयो भनी कुनै कार्यालय जस्तो स्थानमा लगेर सही गर्न लगाइन् । मैले के हो भन्ने थाहा नै नपाई छोरीको भनाइमा लागेर छोरीले जे भनिन्’, उनले भनेकी थिइन, ‘केही समयपछि छोरीले नै त्यो जग्गा बेच्नुपर्ने भयो भनिन्, मैले मन्जुरीनामा दिएँ । हाल मेरो नाममा कुनै पनि जग्गा जमिन छैन ।’

सोदाकुमारीकी छोरी तथा गेहनाथको पत्नी भुवनकुमारीले राणा परिवारबाट आफूले जग्गा किनेको दाबी गरेकी थिइन । र, उनले बयानमा आफूले जग्गा किन्दा पति गेहनाथ राष्ट्रिय योजना आयोगमा शाखा अधिकृत रहेको बताइन् ।

गेहनाथ र सुधीरकुमारले सरसल्लाह नै गरेर भुवनकुमारी र उर्मिलाका नाममा संयुक्तरुपमा जग्गा राखेको सीआईबी स्रोतको दाबी छ । करिव १० वर्ष राखेर उनीहरुले २०६० सालमा त्यो जग्गा ललिता निवास जग्गा प्रकरणका मुख्य योजनाकारमध्ये एक मानिएका रामकुमार सुवेदीलाई दिए । ‘उक्त जग्गा बकस लिखत पारित गरी खरिद गरेको हो’, उर्मिलाले अख्तियारको बयानमा भनेकी थिइन्, ‘मलाई जग्गाधनीसँग भेटाउने व्यक्ति जग्गा दलाल रामनाथ शर्मा हुन् ।’

ललिता निवास जग्गा अनियमितता छानविन प्रतिवेदन अनुसार, २०४९ कात्तिक २५ र पुस २३ गते गरी दुई पटकको निर्णयबाट ११२ रोपनी ४ आना जग्गा सुवर्णसम्सेरका हकदारहरुका नाममा दर्ता हुने निर्णय भएको थियो ।

ललिता निवासको जग्गा राणा परिवारको नाममा दुईपटक नै फिर्ता दिने निर्णय हुँदा कलाधर देउवा डिल्लीबजार मालपोत कार्यालयको प्रमुख मालपोत अधिकृत थिए । पछि राणा परिवारले इन्द्रबहादुर थापा क्षेत्रीको नाममा दुई रोपनी जग्गा बकस दिएको खुल्यो । अख्तियारले गरेको अनुसन्धानका क्रममा उनी कलाधरको साढुभाइ नाता पर्ने खुलेको थियो । इन्द्रबहादुरले बयानमा भनेका थिए, ‘मेरो साढुदाई कलाधर देउजा मालपोत कार्यालयमा अधिकृत पदमा हुँदा वहाँले बालुवाटारमा एउटा जग्गा छ तपाईले आफ्नो नाममा राखिदिनुहोस् भनी अनुरोध गर्नुभएकाले सहयोगसम्म गरेको हुँ । पछि बिक्री गरिसकेको छु ।’

अर्का मालपोत अधिकृत सुरेन्द्रमान कपालीले पनि भतिजी बुहारी शान्ति मल्ल प्रधानांगको नाममा दुई रोपनी आठ आना जग्गा बकस गरेको भेटिएको थियो । ललितानिवासको जग्गा व्यक्तिको नाममा दर्ता गराउने अर्का योजनाकार धर्मप्रसाद गौतम रहेको प्रहरीको केन्द्रीय अनुसन्धान व्यूरो (सीआईबी) मा पुगेको कागजातबाट देखिन्छ ।

गौतम भूमिसुधार तथा मालपोत विभागमा शाखा अधिकृत हुँदा नीतिगत निर्णयबाट राणा परिवारका नाममा जग्गा फिर्ता हुने भनी निर्णय गरेका थिए । उनले सालाका छोरा नाता पर्ने मोहनप्रसाद भट्टराईको नाममा दुई टुक्रा जग्गा लिएको भेटिएको थियो । तीमध्ये उउटा एक रोपनी १४ आनाको थियो भने अर्को एक रोपनी ३ आनाको थियो । – अनलाइनबाट

आउँदो (बिहीबार) सेयर बजार कारोबार नहुने भएको छ। सरकारले बकर ईदमा सार्वजनिक बिदा दिएकोले सेयर बजार पनि बन्द रहने भएको हो। यसर्थ भोलि (बुधबार) नै यो साताको अन्तिम कारोबार हुनेछ।

गृह मन्त्रालयका प्रवक्ता केदारनाथ शर्माद्वारा आज विज्ञप्तिमा जारी गर्दै असार १४ गते बिहीबारका दिन सार्वजनिक बिदा दिने उल्लेख गरेको छ। बकर ईदका अवसरमा सरकारले देशैभर सार्वजनिक बिदा दिएको हो।

आज मंगलबार पनि नेपाली बजारमा सुनको भाउ बढेको छ।

नेपाल सुनचाँदी व्यवसायी महासंघका अनुसार आज सुनको भाउ तोलामा २०० रुपैयाँले बढेको हो। योसँगै प्रतितोला फाइन गोल्ड १ लाख १० हजार ६०० रुपैयाँ र तेजाबी गोल्ड १ लाख १० हजार ५० रुपैयाँ कायम भएको छ।

आज चाँदीको भाउ तोलामा १० रुपैयाँले बढेर १ हजार ३७५ रुपैयाँ कायम भएको छ। हिजो तोलामा १५ रुपैयाँले बढेर चाँदी १ हजार ३६५ रुपैयाँमा कारोबार भएको थियो।

रोमानियामा भएको कन्सर्टमा आफूलाई बोतल प्रहार गर्ने नेपाली युवकलाई गायक प्रकाश सपुतले माफी दिएका छन् । सपुतसँगै बुचारेस्ट पुगेकी गायिका प्रीति आलेले सार्वजनिक गरेको भिडियोमा माफी दिएको देख्न सकिन्छ । भिडियोमा सपुत र ती युवकलाई हात मिलाएको र अँगालो हालेर मिलेको देखिएको छ ।

‘मेरो नाकमा पनि दुखेको छ र मनमा पनि । यसले मलाई भन्दा पनि तपाईंको लाइफमा असर गर्छ । हामी देश छाडेर परदेशमा गएका छौं । आइन्दा यस्तो काम नगर्नुहोला,’ गायक सपुतले ती व्यक्तिलाई माफी दिंदै भनेका छन्, ‘तपाईंले गर्दा मेरो मोरल डाउन भएको छ । तपाईंको लाइफलाई तलमाथि हुन नदिन पनि माफी दिएको हुँ ।’

ती युवकले पनि आफूलाई कसैले बोतल प्रहारका लागि नउक्साएको प्रष्टीकरण दिएका छन् । ‘रमाइलो गर्दागर्दै यस्तो भयो,’ ती युवकले गायक सपुत र आयोजक नरेश गिरीको सामन्नु भनेका छन् । सोही भिडियोमा सपुतले ती युवकलाई मादक पदार्थ सेवन नगर्न सल्लाह समेत दिएका छन् । ‘आफूले पत्तो नपाउने गरी पिउने काम नगर्नुहोला,’ सपुतको सल्लाह थियो ।

गायक सपुतको आग्रहअनुसार आयोजकले ती नेपाली युवकविरुद्धको प्रहरी उजुरी फिर्ता लिने भएको छ । साथै उनलाई नेपाल डिपोर्ट नगर्ने समेत जनाइएको छ । उक्त भिडियोमा आयोजक गिरीले प्रहरी र अध्यागमनमा दिएको उजुरी फिर्ता लिने बताएका छन् । ‘प्रकाशजीको आग्रहअनुसार प्रहरी र अध्यागमनमा दर्ता गरेको केस फिर्ता लिंदैछौं,’ गिरीले भने ।

ललिता निवास प्रकरणमा छानबिन गर्न भन्दै प्रहरीले व्यवसायी मीनबहादुर गुरुङलाई पक्राउ गरेको छ। उनलाई नक्सालबाट प्रहरीको केन्द्रीय अनुसन्धान ब्यूरो (सीआइबी) को टोलीले पक्राउ गरेको हो ।

गुरुङ नेपालको सबैभन्दा ठूलो चेन भएको सुपरमार्केट भाटभटेनीका सञ्चालक हुन्।

बालुवाटारको ललिता निवास जग्गा हिनामिना प्रकरणमा मुछिएका गुरुङलाई यसअघि विशेष अदालतले धरौटीमा रिहा गर्न आदेश दिएको थियो।

अख्तियारले दुरुपयोग अनुसन्धान आयोगले गुरुङसँग ५० करोड ४७ लाख रुपैयाँको बिगो मागदाबी गर्दै विशेष अदालतमा मुद्दा दायर गरेको थियो। अहिले प्रहरीले पुन: गुरुङलाई पक्राउ गरेको हो।

न्यायाधीशद्वय प्रेमबहादुर कार्की र अब्दुल अजिज मुसलमानको संयुक्त इजलासले गुरुङलाई २ करोड धरौटीमा रिहा गर्न आदेश दिएको थियो।

टमाटरको मूल्य भारतका बजारमा प्रतिकिलो १०० भारतीय रुपैयाँ(भारु) नाघेको छ ।

हाल टमाटर प्रतिकिलो ६५ देखि ७० भारुमा थोक बजारमा बिक्री भइरहेको छ । एक साताअघि थोक बजारमा टमाटर ३०–३५ भारुप्रतिकिलोमा बिक्री हुँदै आएको थियो । खुद्रा बजारमा यसको मूल्य प्रतिकिलो ४०–५० भारु थियो । यसको अर्थ मूल्य झण्डै दुइगुणा भएको छ ।

मे महिनामा उत्तर प्रदेश, महाराष्ट्रलगायत धेरै राज्यमा टमाटरको मुल्य प्रतिकिलो २–५ रुपैयाँ थियो । अर्थात् एक महिनामा टमाटरको मूल्य १९०० प्रतिशतले बढेको छ ।

भारतको संघीय राजधानी दिल्लीमा टमाटर ७० देखि १०० रुपैयाँ प्रतिकिलोमा बिक्री भइरहेको छ । मध्य प्रदेशको बजारमा टमाटर ८० देखि १०० रुपैयाँ, उत्तर प्रदेशमा ८० देखि १०० रुपैयाँ, राजस्थानमा ९० देखि ११० रुपैयाँ र पञ्जाबमा ६० देखि ८० रुपैयाँमा बिक्री भइरहेको छ।