नेपाली कांग्रेस रूपान्तरण अभियानले आचारसंहिता घोषणा गरेको छ।

रूपान्तरण अभियानले दोस्रो चरणमा १६५ प्रतिनिधि सभा निर्वाचन क्षेत्रमा कार्यक्रम गर्नुअघि आचारसंहिता बनाएका हुन्।

मंसिरमा हुने कांग्रेस महासमिति बैठकलाई लक्षित गर्दै रूपान्तरण अभियानले निर्वाचन क्षेत्र केन्द्रित अभियान सुरू गरेको हो।

बिपीको जन्मजयन्तीका अवसर पारेर आइतबार ८ बुँदे आचारसंहितासमेत घोषणा गरिएको छ ।

अभियानका क्रममा विभिन्न जिल्ला र निर्वाचन क्षेत्रमा जाँदा होटलमा बस्न नपाइने र पार्टीका नेता, कार्यकर्ताकै घरमा बस्नुपर्ने नियम बनाइएको हो।

त्यस्तै तडकभडक र खर्चिलो यात्रा नगर्ने, माला र खादाको प्रयोग नगर्ने, तोकिएको समयमै कार्यक्रम सुरू गर्ने, विषयकेन्द्रित भएर भाषण गर्नुपर्ने र छोटकरीमा कुरा राख्नुपर्ने आचारसंहिता बनाइएको छ ।

प्रधानमन्त्रीसमेत रहेका नेकपा माओवादी केन्द्रका अध्यक्ष पुष्पकमल दाहाल प्रचण्डले निरंकुश राजतन्त्रका दलालहरूले लोकतान्त्रिक आन्दोलनका नेतामाथि खुकुरी प्रहार गरेको बताएका छन्।

सत्तारूढ नेपाली कांग्रेसका सहमहामन्त्री महेन्द्र यादवमाथि गत भदौ २० गते भृकुटीमण्डपमा श्यामबहादुर सापकोटाले खुकुरी प्रहार गरेपछि ‘नेपाल हिन्दु राष्ट्र हुनुपर्ने, राजतन्त्र जीन्दावाद’ जस्ता नारा लगाएका थिए।

प्रधानमन्त्री दाहालले सन्देश सभामा भने, ‘हामी कमजोर देखिएपछि कसरी प्रतिक्रान्तिकारीहरूको मनोबल उठ्दो रहेछ? एक-दुई जना भए पनि गर्जन गरेर! अस्ती काठमाडौंमा तपाईंहरूले देख्नुभयो- खुकुरी हान्ने। निरंकुश राजतन्त्रका दलालहरू, भ्रष्टहरूले लोकतान्त्रिक आन्दोलनका नेतामाथि खुलेआम खुकुरी प्रहार गर्ने घटना सामान्य एउटा घटना मात्र होइन।’

‘केही समयपछि राष्ट्रियता, जनतन्त्र, जनजीविकाका विषयलाई लिएर लाखौं जनतालाई सडकमा ल्याउनुछ,’ उनले भने, ‘ती प्रतिक्रान्तिकारी र दक्षिणपन्थी निरंकुशतावादी तथा सामान्ती र दलालको सातो जाने गरी जनताको तागत बढाउनुछ।’

परिवर्तनका सम्बाहकलाई अपमानित गर्ने काम भइरहेको उनले बताए। ‘हामीलाई अपमानित गर्न खोज्ने, घेरा हाल्न खोज्ने, जनताको त्यत्रो त्याग र बलिदानबाट ल्याएको परिवर्तनलाई अपमानित गर्न खोज्ने प्रवृत्तिलाई परास्त गर्नुपर्छ,’ प्रधानमन्त्री दाहालले भने।

आफुहरु चुप लागेकोले = सामाजिक सञ्जालमा पनि हेर्नै नसकिने गरी भिडिओ तथा कुराहरू लेख्न थालिएको उनको भनाइ छ।

समाजवादी मोर्चाको अवधारणा र उद्देश्य प्रकाश पार्न आज उसले कोशी प्रदेशस्तरीय सन्देश सभा सभा गर्न लागेको छ ।

दिउँसो १ बजे विराटनगरमा सभा हुने छ ।

सभालाई माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’, जनता समाजवादी पार्टीका अध्यक्ष उपेन्द्र यादव, नेकपा (एकीकृत समाजवादी) का अध्यक्ष माधवकुमार नेपाल र नेपाल कम्युनिस्ट पार्टीका महासचिव नेत्रविक्रम चन्द विप्लवले सम्बोधन गर्ने छन्।

सातै प्रदेशमा सन्देश सभा गरिरहेको मोर्चाको यो अन्तिम सभा हो।

मोर्चाको नेतृत्व चार–चार महिनामा फेरबदल हुने छ भने आधारभूत तहसम्म संरचना विस्तार गर्ने उसको लक्ष्य छ।

कपा (एमाले) का अध्यक्ष केपी शर्मा ओलीले यति होल्डिङ्स, ओम्नी ग्रुप र भाटभटेनीका सञ्चालक मीनबहादुर गुरूङको बचाउ गरेका छन्।

आइतबार पार्टी कार्यालय च्यासल ललितपुरमा आयोजित एक कार्यक्रममा उनले दलाल पुँजीवादीहरुले यिनिहरुलाई खेदेको बताए ।

‘यति होल्डिङ्सलाई उनीहरू खेद्छन् किनभने त्यो राष्ट्रिय पुँजी हो। सोलुको एउटा शेर्पा भारी बोकेर हिँड्थ्यो रे बच्चैदेखि। त्यस्तो शेर्पाले आएर यहाँ हवाइजहाज पनि उडाएको छ। पर्यटन पनि चलाएको छ,’ ओलीले भने,‘ होटल पनि चलाएको छ। के पनि गरेको छ हेलिकप्टर पनि चलाएको छ। यसो गर्न पनि पाइन्छ। भारी बोकेर हिँड्नु पर्नेले यस्तो गर्ने भनेर उनीहरू खेद्छन्।’

उनले भने ‘माओवादीहरू गायत्री मन्त्र जप्दैनन्, ओम्नी ओम्नी भन्छन्। यति यति भन्छन्, भाटभटेनी भाटभटेनी भन्छन्। मीनबहादुर मीनबहादुर। गुरूङको छोरो भारी बोकेर आएको गर्न खान दिनु हुँदैन भन्छन्,’ ओलीले भने,‘उनीहरूले राष्ट्रिय पुँजीपतिहरूलाई छानी छानी लखेटेका छन्। विरूद्धमा कोही बोल्दा सांसद समातिन्छ, एउटा सचिव अधिकृत हुँदा हस्ताक्षर गरेका कारण विमानस्थलबाट समातिन्छ। यो दलाल पुँजीवादीहरुको तमासा हो।’

भाटभटेनीका सञ्चालक गुरूङ ललिता निवास प्रकरणमा प्रकाउ परेका थिए भने उनलाई आजै जिल्ला अदालतले धरौटीमा रिहा गर्न आदेश दिएको छ।