आफ्न प्रदेश सभा सदस्यहरुलाई पैसा बाँड्ने मधेश प्रदेश सरकारको निर्णयविरुद्ध परेको रिटमा सर्वोच्च अदालतले कारण देखाऊ आदेश जारी गरेको छ ।

मधेस सरकारले प्रत्यक्ष निर्वाचित सांसदलाई ५ र समानुपातिकलाई डेढ करोड रुपैयाँ उपलब्ध गराउने निर्णय गरेको थियो । उक्त निर्णय बिरुद्ध
सर्वोच्च अदालतका न्यायाधीश शारंगा सुवेदीको इजलासले रिटमा सुनुवाइ गर्दै कारण देखाऊ आदेश जारी गरी अन्तरिम आदेशका लागि छलफलमा बोलाएको हो ।

सो निर्णयविरुद्ध मंगलबार आबिद हुसेन लगायतले मुख्यमन्त्री तथा मन्त्रिपरिषद्को कार्यालयलाई विपक्षी बनाइ रिट दायर गरेका थिए ।

यसअघि चालु आर्थिक वर्षमा संघीय सरकारले सांसदहरुलाई रकम दिने घोषणा गरेको थियो जसलाई सर्वोच्चले रोक लगाएको थियो ।

बंगलादेशले ५ वर्षका लागि नेपालबाट ४० मेगावाट बिजुली लैजाने भएको छ । बंगलादेशको सरकारले यस्तो निर्णय गरेको हो ।

मंगलबार बंगलादेशको खरिद कमिटीको बैठकले नेपालबाट ४० मेगावाट बिजुली खरिद ‍गर्ने भनी निर्णय गरेको हो ।

मन्त्रिपरिषद् डिभिजन (सुधार तथा समन्वय) सचिव महमुदुल होसैन खानले बैठकका निर्णयहरुबारे पत्रकारहरुलाई जानकारी दिएका छन् । ‘नेपालबाट भारतको प्रसारण ग्रीड हुदै बंगलादेश पुग्नेछ । भारतलाई ०.०५९ रुपैयाँ प्रतियुनिट ट्रेडिङ मार्जिन तिर्नुपर्छ । बंगलादेशले भारतलाई प्रसारणलाइनको शुल्क पनि तिर्नुपर्छ । प्रसारणलाइनको शुल्क तोक्न बाँकी छ’ उनले भने।

बंगलादेशकी प्रधानमन्त्री शेख हसिना नेपाल भ्रमणमा आउने र सोही समय सो सम्झौता हुन सक्ने बंगलादेशी सञ्चारमाध्यमहरुले उल्लेख गरेका छन् । प्रारम्भिक रुपमा पाँच वर्षका लागि सम्झौता गर्न लागिएको हो । वार्षिक १३० करोड टाका खर्च हुनेछ । पाँच वर्षमा ६५० करोड टाका खर्च हुने अनुमान बंगलादेशको अर्थ मन्त्रालयलाई उदृत गर्दै बंगलादेशको सरकारी समाचार संस्था बीएसएसले जनाएको छ । बंगलादेशी मुद्रा १ टाकाको नेपाली १ रुपैयाँ १४ पैसा हुन्छ ।

बैंक तथा वित्तीय संस्थाले १० महिनामा ५३ अर्ब रुपैयाँ खुद नाफा कमाएका छन् । नेपाल राष्ट्र बैंकको तथ्यांकअनुसार बैंक तथा वित्तीय संस्थाले चालु आर्थिक वर्षको वैशाख मसान्तसम्म ५३ अर्ब १९ करोड ६३ लाख रुपैयाँ मुनाफा गरेका हुन् ।

बैंक तथा वित्तीय संस्थाहरूले चैत मसान्तसम्ममा ४४ अर्ब ६७ करोड रूपैयाँ खुद मुनाफा गरेका थिए । १ महिनामा उनीहरूले साढे ८ अर्ब नाफा गरेका हुन् ।

यस अवधिमा सबैभन्दा बढी कमाउने बैंक नबिल हो । वैशाख मसान्तसम्म नबिलले ५ अर्ब ४६ करोड रुपैयाँ कमाउँदा ग्लोबल आईएमई दोस्रो स्थानमा छ । ग्लोबल आईएमईले १० महिनामा ४ अर्ब १२ करोड नाफा गरेको छ ।

नेपाल इन्भेस्टमेन्ट मेगा र प्राइम कमर्सियल बैंकको खुद मुनाफा ३ अर्ब बढी छ । त्यस्तै एनआईएमबीले १० महिनामा ३ अर्ब ७७ करोड कमाउदा एभरेष्ट बैंकको खुद मुनाफा २ अर्ब ९८ करोड छ ।

कृषि विकास, स्ट्यान्डर्ड चार्टर्ड बैंक, राष्ट्रिय वाणिज्य, प्रभु, एनएमबि, हिमालयन र एनआईसी एशिया पनि २ अर्बभन्दा बढी कमाउनेको सूचीमा परेका छन् । १० महिनामा सबैभन्दा कम खुद मुनाफा नेपाल बैंकको छ ।

१० महिनामा वाणिज्य बैंकहरूको नाफा ४८ अर्ब ६० करोड छ ।

विकास बैंकहरुमा मुक्तिनाथ बैंकले १० महिनामा बिकास बैंकमध्ये सबैभन्दा धेरै अर्थात ९९ करोड खुद मुनाफा गर्दा दोस्रो बढी नाफा गरिमा विकास बैंकले गरेको छ । बढी नाफा गर्नेका आधारमा शाइन रसुंगा, महालक्ष्मी र कामना शीर्ष ५ मा छन् ।

यस्तै मञ्जुश्री कम्पनीको १० महिनाको नाफा २० करोड छ ।