काठमाडौं । सेयर बजारका लगानीकर्ता दिपेन्द्र अग्रवालको संयोजकत्वमा सुरु हुन लागेको ‘हिँड काठमाडौं’ संघर्ष अभियानका तयारी तीव्र बनेका छन् । लगातार घट्दो बजार र नीतिगत सुधारको अभावप्रति असन्तुष्टि जनाउँदै अग्रवाल नेतृत्वको समूहले नेपाल धितोपत्र बोर्ड (सेबोन) समक्ष १८ बुँदे माग प्रस्तुत गरिसकेको छ ।

अग्रवालले तिहारपछि आन्दोलनको चरण सुरु हुने चेतावनी दिएका छन् । उनका अनुसार, बोर्डले माग सम्बोधन नगरे कात्तिक १४ गतेदेखि जुलुस, धर्ना र रिले अनसनसहितको विरोध कार्यक्रम सुरु गरिनेछ ।

“हामीले सेबोनमा हाम्रा मागहरू स्पष्ट रूपमा बुझाएका छौं,” अग्रवालले भने, “तर अझै पनि सुनुवाइ नभए हामी चरणबद्ध आन्दोलनका कार्यक्रम घोषणा गर्नेछौं।” उनका अनुसार ‘हिँड काठमाडौं’ अभियानको उद्देश्य सेयर बजार सुदृढीकरण, विस्तार र दीर्घकालीन सुधार हो ।

📜 १८ बुँदे मागपत्रका मुख्य बुँदा

‘हिँड काठमाडौं’ अभियानले तिहारअघि नै धितोपत्र बोर्डमा १८ बुँदे मागपत्र बुझाइसकेको छ । बोर्डले कात्तिक महिनाभित्र माग सम्बोधन गर्ने आश्वासन दिएको बताइए पनि लगानीकर्ताहरूले ठोस कदम नचालिएको आरोप लगाएका छन् ।

मुख्य मागहरू यस प्रकार छन्ः

1. सेबोनका अध्यक्ष सन्तोष नारायण श्रेष्ठले सुधार गर्न असमर्थ भए राजीनामा दिनु पर्ने।
2. एनआरएनलाई दोस्रो बजारमा फ्री इन्ट्री र फ्री एक्जिटको अधिकार।
3. सेयर बिक्रीपछि भुक्तानी ढिलाइ भए ब्रोकरबाट ब्याज असुल गर्ने व्यवस्था।
4. बैंकलाई कुल कर्जाको २०% सम्म शेयर धितो कर्जा प्रवाह गर्न दिने।
5. ब्रोकर कमिसनमा ५०% कटौती र अन्य शुल्क निःशुल्क बनाउने।
6. पूँजीगत लाभकर अल्पकालीन लगानीमा ५% र दीर्घकालीन लगानीमा ०% कायम गर्ने।
7. म्युचुअल फण्डको ५% आईपीओ आरक्षण हटाएर विद्यार्थीलाई दिने।
8. बैंक तथा वित्तीय संस्थाले खरिद गरेको सेयर ६ महिनासम्म बिक्री गर्न नपाउने प्रतिबन्ध हटाउने।
9. कर्जामा रहेका कम्पनीका प्रमोटर सेयरलाई पब्लिक सेयरमा रूपान्तरण गर्न नपाउने।
10. नेप्से ३० इण्डेक्समा आधारित नयाँ लगानी उपकरण प्रवर्धन गर्ने।
11. बुक भ्यालु १०० भन्दा कम भएका कम्पनीको आईपीओ निष्कासन रोक्ने।
12. ब्रोकरमार्फत शेयर मार्जिन कर्जा तत्काल सुचारु गर्ने।
13. इन्ट्रा डे ट्रेडिङ, सर्ट सेलिङ र डेरिभेटिभ मार्केट सुरु गर्ने।
14. शेयर खरिदबिक्रीमा रियल टाइम सेटलमेण्ट ल्याउने।
15. तीन वर्षभित्र नयाँ ब्रोकर लाइसेन्स थप्ने।
16. सेबोन र नेप्सेको सञ्चालक समितिमा लगानीकर्ताको अनिवार्य प्रतिनिधित्व।
17. आईपीओ स्वीकृतिमा हुने भ्रष्टाचार अन्त्य गरी पारदर्शी प्रक्रिया अपनाउने।

आन्दोलनका तयारी र चेतावनी

अग्रवालका अनुसार, माग सम्बोधन नभए “हिँड काठमाडौं” अभियानले चरणबद्ध आन्दोलन गर्ने तयारी गरेको छ । “हामी वार्ताको बाटो बन्द गरेका छैनौं,” उनले भने, “तर लगानीकर्ताको आवाज सुन्ने प्रयास नगर्ने हो भने हामी सडकमा पुग्न बाध्य हुनेछौं।”

लगातार ओरालो लागेको बजारमा सुधारका लागि लगानीकर्ताहरूले नीतिगत हस्तक्षेप, पारदर्शिता र लगानीमैत्री वातावरणको माग गर्दै आएका छन् ।

अन्तर्राष्ट्रिय बजारमा आज पुनः सुनको मूल्यमा उल्लेखनीय वृद्धि भएको छ। आज सुनको मूल्य १.६७ प्रतिशत अर्थात् ६७ अमेरिकी डलरले बढ्दै प्रतिऔंस ४ हजार ११६ डलरमा कारोबार भइरहेको छ। लगातार दुई सेसनसम्म घटेको मूल्य आज पुनः उकालो लागेको हो।

गत सोमबार सुनको मूल्य प्रतिऔंस ४ हजार ३८१ डलरसम्म पुगेको थियो, जुन हालसम्मकै उच्च स्तर मानिन्छ। तर त्यसपछि सुनमा आएको तीव्र गिरावट पछिल्लो पाँच वर्षकै सबैभन्दा ठूलो गिरावटका रूपमा दर्ज भएको थियो।

विश्लेषकहरूका अनुसार यो वर्षका सम्पूर्ण आधारभूत तत्वहरूले सुनको मूल्य वृद्धि गर्न सहयोग पुर्‍याएका छन्। मूल्य घटेको बेला लगानीकर्ताहरूले अवसरको रूपमा खरिद बढाउनुका साथै विश्वभरिको भू–राजनीतिक तनावले पनि सुनलाई थप समर्थन गरेको बताइन्छ।

यस वर्ष हालसम्म सुनको मूल्य कुल ५७ प्रतिशतले बढिसकेको छ, जसले लगानीकर्तामा पुनः आकर्षण बढाएको देखिन्छ।

यस्तै, चाँदीको मूल्य पनि आज बढेको छ। चाँदी ०.५४ डलरले बढ्दै प्रतिऔंस ४८.६३ डलरमा कारोबार भइरहेको छ।

🔸 स्रोत: अन्तर्राष्ट्रिय धातु बजार विश्लेषकहरू

नेपाली मूलका व्यक्तिले स्थापना गरेको सूचना प्रविधिसम्बन्धी काम गर्ने कम्पनी अमेरिकी सेयरबजारमा सूचीकृत भएको छ । नेपाली मूलका उद्यमी डा. समीर मास्केले स्थापना गरेको कम्पनी फ्युजमेसिन्स नास्डकमा सूचीकृत भई बिहीबारदेखि कारोबारको थालनी गरेको छ ।  

यो कम्पनी २० करोड अमेरिकी डलरमा फ्युज नामले सूचीकृत भएको हो ।  

फ्युजमेसिन्सले एआई सम्बन्धी काम गर्छ । यो कम्पनी दुई वर्षअगाडि सीएसएलएमसँग मर्ज भएको थियो । कम्पनीमा हाल ३ सय ५० कर्मचारीले काम गरिरहेका छन् । जसमध्ये २६० जना नेपालमा कार्यरत छन् ।

‘सानो, मिशनबाट संचालित हाम्रो टोली आज सार्वजनिक रूपमा सूचीबद्ध कम्पनी बनेका छ । यो कोशेढुङ्गाले नवीनता र कार्यान्वयनप्रति हाम्रो अटल प्रतिबद्धतालाई प्रतिबिम्बित गर्दछ,’ कम्पनीको सीईओ समेत रहेका डा. समीर मास्केले भने, ‘हामीले बनाएको प्लेटफर्म र हाम्रा साझेदारहरू र ग्राहकहरूले हामीमा राखेको विश्वासमा हामी गर्व गर्छौं। यो लिस्टिङले हाम्रो अर्को अध्यायको सुरुवात गरेको छ, जुन अनुशासित वृद्धि, रणनीतिक लगानी र हाम्रा शेयरधारकहरूका लागि दिगो मूल्य निर्माणमा केन्द्रित छ ।’

कम्पनीले उत्पादन इनोभेसन, ग्राहक विस्तार, बिक्री र मार्केटिङमा लक्षित लगानीमा रणनीतिक रूपमा लगानी गर्ने योजना बनाएको छ। यी पहलहरू कदमीहरुले आम्दानीका अवसरहरू बढाउन, मार्जिन विस्तार गर्न र सेयरधारकहरूलाई दीर्घकालीन मूल्य प्रदान गर्न डिजाइन गरिएको कम्पनीले जनाएको छ ।  

फ्युज मेशिन सन् २०१३ मा स्थापना भएको थियो । यसका कार्यालयहरु उत्तरी अमेरिका, एसिया र ल्याटिन अमेरिकामा रहेका छन् । 

झापा । चालु आर्थिक वर्ष २०८२/८३ को पहिलो तीन महिनामा मेची भन्सार कार्यालयबाट १२ अर्ब २८ करोड ३० लाख रुपैयाँ बराबरका मालवस्तु आयात भएका छन्।

यो रकम अघिल्लो आर्थिक वर्षको सोही अवधिको तुलनामा १ अर्ब ४४ करोड २७ लाख रुपैयाँ (१३.३१ प्रतिशत) ले बढी हो।

गत आव २०८१/८२ को पहिलो त्रैमासमा काँकडभिट्टा नाकाबाट १० अर्ब ८४ करोड ३ लाख रुपैयाँ बराबरका वस्तु आयात भएका थिए।

यस अवधिमा निर्यात भने घटेको छ। समीक्षा अवधिमा मेची नाकाबाट ४ अर्ब ८० करोड ३९ लाख रुपैयाँ बराबरका सामान निर्यात भएका छन्, जुन अघिल्लो आवको सोही अवधिको ६ अर्ब ८ करोड ६९ लाख रुपैयाँ भन्दा २१.०८ प्रतिशतले कम हो।

राजस्व संकलनका दृष्टिले भने यो कार्यालयले राम्रो प्रदर्शन गरेको छ।

पहिलो तीन महिनामा कार्यालयले ४ अर्ब १५ करोड २० लाख ८ हजार रुपैयाँ बराबरको राजस्व संकलन गरेको छ।

यो अघिल्लो वर्षको सोही अवधिको तुलनामा १५.६९ प्रतिशतले बढी हो।

काठमाडौं । विद्युत् विकास विभागले चालु आर्थिक वर्षको पहिलो त्रैमासमा १० वटा जलविद्युत् आयोजनालाई निर्माण अनुमति प्रदान गरेको छ। ती आयोजनाको संयुक्त उत्पादन क्षमता २४१.५० मेगावाट बराबर रहेको विभागले जनाएको छ।

विभागका अनुसार हालसम्म कुल २६६ जलविद्युत् आयोजनाले निर्माण अनुमतिपत्र प्राप्त गरेका छन्, जसको संयुक्त क्षमता १० हजार ८२५ मेगावाट पुगेको छ।

नयाँ अनुमति प्राप्त आयोजनाहरू

विभागले चालु आवको असोज मसान्तसम्म लापा खोला (४.७२ मेगावाट), लोअर बरुण (१३२ मेगावाट), म्याग्दी खोला बी (१२.५० मेगावाट), तल्लो लिखु क्यासकेड (६ मेगावाट), माथिल्लो मेलम्ची (४.९५ मेगावाट), सुपर सभा खोला (९.५५ मेगावाट), लोअर मेलम्ची खोला (४.९६ मेगावाट), अप्पर सेती–१ (१३ मेगावाट), होङ्गु खोला (२८.९० मेगावाट) र इन्दुवा खोला (२४.९२ मेगावाट)लाई निर्माण अनुमति दिएको हो।

सर्वेक्षण र निर्माण अनुमति प्रक्रियामा रहेका परियोजना

विभागले हालसम्म १८५ आयोजनालाई सर्वेक्षणको अनुमति दिएको छ। यस्तै, थप ५९ वटा आयोजनाले निर्माण अनुमतिपत्रका लागि आवेदन दिएका छन्, जसको संयुक्त क्षमता १० हजार ५३२ मेगावाट रहेको छ।

सौर्य ऊर्जा परियोजना

सौर्य ऊर्जातर्फ १२ आयोजनाले निर्माण अनुमति पाइसकेका छन्, जसको संयुक्त क्षमता ८४ मेगावाट रहेको छ। साथै, ३ वटा सौर्य परियोजनाले (कुल १५ मेगावाट) निर्माण अनुमतिका लागि आवेदन दिएका छन्।

अनुमति खारेज

विभागका अनुसार अनुमति लिएर पनि निर्माण कार्य अघि नबढाएका १५ आयोजनाको अनुमतिपत्र खारेज गरिएको छ।

विभागले जारी गरेको विवरणअनुसार, चालु वर्षको पहिलो त्रैमासमै जलविद्युत् क्षेत्रमा उल्लेख्य प्रगति देखिएको छ, जसले आगामी वर्षहरूमा देशको ऊर्जा उत्पादन क्षमता थप सुदृढ हुने अपेक्षा गरिएको छ।

काठमाडौं । प्रधानमन्त्री सुशीला कार्कीले छठ पर्व सकिनासाथ मन्त्रिपरिषद् विस्तार गर्ने तयारी थालेकी छिन्। लामो समयदेखि अपूर्ण रहेको मन्त्रिपरिषद्मा नयाँ मन्त्रीहरूको समावेशबारे अन्तिम चरणको छलफल भइरहेको सरकारका प्रवक्ता तथा सूचना तथा सञ्चारमन्त्री जगदीश खरेलले जानकारी दिएका छन्।

मंगलबार अपरान्हदेखि रातिसम्म चलेको सरकार र राजनीतिक दलका प्रतिनिधिहरूबीचको छलफलपछि सञ्चारकर्मीहरूसँग कुरा गर्दै प्रवक्ता खरेलले भने, “प्रधानमन्त्रीज्यूले पनि सरकार विस्तारबारे केही सोचिरहनुभएको छ र सोअनुसार तयारी भइरहेको जस्तो लाग्छ। सम्भवतः तिहार र छठलगत्तै बिस्तार हुनेछ।”

प्रधानमन्त्री कार्कीले यसअघि पनि मन्त्रिपरिषद् विस्तारको प्रयास गरेकी थिइन् तर प्रस्तावित केही नामहरू विवादित भएपछि प्रक्रिया रोकिएको थियो। तर हाल विभिन्न दल र समूहहरूसँगको छलफल अन्तिम चरणमा पुगेकोले यसपटक मन्त्रिपरिषद् विस्तारको सम्भावना अत्यधिक रहेको बताइएको छ।

सरकारमा अहिलेसम्म जेनजी प्रतिनिधिहरूको सहभागिता नहुँदा आलोचना हुँदै आएको छ। स्रोतका अनुसार, आगामी विस्तारमा विभिन्न राजनीतिक दल र नागरिक समाजका व्यक्तिहरूलाई समेत समावेश गरिने सम्भावना छ।

नयाँ मन्त्रीहरूको नाम र मन्त्रालयको बाँडफाँडबारे भने सरकारका प्रवक्ता खरेलले केही खुलासा गरेका छैनन्। तर राजनीतिक वृत्तमा छठपछि सरकार विस्तारको तयारीलाई नयाँ राजनीतिक सन्तुलनको संकेतका रूपमा हेरिएको छ।

काठमाडौं । युनिलिभर नेपाल लिमिटेडले आफ्नो ३२औं वार्षिक साधारण सभा आगामी कात्तिक २५ गते आयोजना गर्ने निर्णय गरेको छ। कम्पनीको सञ्चालक समितिको बैठकले उक्त सभा दिउँसो ४:३० बजे सुरु हुनेगरी कार्यक्रम तय गरेको हो।

सभामा आर्थिक वर्ष २०८१/८२ का लागि सेयरधनीहरूलाई आकर्षक लाभांश वितरण गर्ने प्रस्ताव पारित गरिनेछ। कम्पनीले गत आवको मुनाफाबाट प्रतिकित्ता १,८४२ रुपैयाँ नगद लाभांश वितरण गर्ने विशेष प्रस्ताव पेस गरेको छ।

यससँगै कम्पनीको संस्थापक सेयरधनीको नाम सिबक्रिम होल्डीङ्स प्रा. लि. बाट आईजे ग्रुप होल्डीङ्स प्रा. लि. मा परिवर्तन भएको व्यहोरा अभिलेख गर्ने र सो बमोजिम कम्पनीको प्रबन्धपत्र तथा नियमावलीमा आवश्यक संशोधन गर्ने प्रस्ताव पनि सभामा पेश गरिनेछ।

सभामा २०८२ असार मसान्तसम्मको वासलात, नाफा–नोक्सान हिसाब, नगद प्रवाह विवरण र सञ्चालक समिति तथा लेखा परीक्षकको प्रतिवेदन माथि छलफल गरी पारित गरिनेछ। साथै, चालु आर्थिक वर्षका लागि लेखा परीक्षक नियुक्त गरी निजको पारिश्रमिक निर्धारण गर्ने निर्णय पनि सभाबाट गरिनेछ।

त्यस्तै, कम्पनीले आफ्नो संस्थागत सामाजिक उत्तरदायित्व (CSR) अन्तर्गत सामाजिक तथा सामुदायिक परियोजनाहरूमा आर्थिक सहयोगका लागि प्रस्ताव समेत अघि सारेको छ।

साधारण सभा र लाभांश वितरण प्रयोजनका लागि कम्पनीले कात्तिक ११ गते एक दिनका लागि बुक क्लोज गर्ने निर्णय गरेको छ। त्यसअनुसार, कात्तिक १० गतेसम्म नेप्सेमा कारोबार भई कायम रहेका सेयरधनीहरू मात्रै सभामा सहभागी हुन र लाभांश प्राप्त गर्न योग्य हुनेछन्।

युनिलिभर नेपाल देशको प्रमुख उपभोक्ता वस्तु उत्पादन गर्ने कम्पनी हो, जसले विगतका वर्षहरूमा पनि निरन्तर उच्च लाभांश वितरण गर्दै लगानीकर्ताको विश्वास कायम राख्दै आएको छ।