काठमाडौं । ग्रीन भेन्चर्स लिमिटेडको लक इन समयावधि आज समाप्त भएको छ । कम्पनीको २ करोड ८२ लाख १६ हजार ९५० कित्ता सेयरको लक इन अवधि समाप्त भएको हो ।
कम्पनीको संस्थापक सेयर, आयोजना प्रभावित क्षेत्रका बासिन्दाका लागि बाँडफाँड गरिएको तथा कर्मचारीका लागि सुरक्षित गरिएको सेयरको लक इन अवधि खुलेको छ । यस अन्तर्गत २ करोड ५० लाख कित्ता संस्थापक सेयर, आयोजना क्षेत्रका स्थानिय बासिन्दालाई बाँडफाँड गरिएको ३१ लाख २३ हजार २ सय कित्ता तथा कर्मचारीका लागि बाँडफाँड गरिएको ९३ हजार ७५० कित्ता रहेको छ ।
कम्पनीले आयोजना प्रभावित क्षेत्रका बासिन्दाका लागि विसं २०७८ फागुन २ गतेदेखि फागुन २० गतेसम्म आईपीओ निष्कासन गरेको थियो । सो आईपीओ सोही वर्षको फागुन २९ गते बाँडफाँड गरिएको थियो । साथै, सर्वसाधारण (कर्मचारी समेत) का लागि कम्पनीले २०७८ चैत ८ गतेदेखि चैत ११ गतेसम्म आईपीओ निष्कासन गरेको थियो, जसको बाँडफाँड चैत २० गते गरिएको थियो ।
धितोपत्र बोर्डले सर्वसाधारणका लागि निष्कासन गरि बाँडफाँड गरिएको मितिले तीन वर्षसम्म संस्थापक सेयरधनी, स्थानिय बासिन्दा तथा कर्मचारीलाई बाँडफाँड गरिएको सेयर लक इनमा राख्नुपर्ने व्यवस्था गरेको थियो । यस अवधिमा यस्ता सेयरहरू बिक्री गर्न नपाइने कानुनी व्यवस्था रहेको छ ।
कम्पनीको सञ्चालक, कार्यकारी प्रमुख, लेखापरिक्षक, कम्पनी सचिव वा संगठित संस्थाको व्यवस्थापन वा लेखा सम्बन्धि कार्यमा प्रत्यक्ष रुपमा संलग्न व्यक्तिले आफ्नो पदमा रहँदा वा अवकाश प्राप्त गरेको एक वर्षसम्म कम्पनी वा यसको सहायक संस्थाको धितोपत्र खरिद बिक्री गर्न वा हस्तान्तरण गर्न नपाउने व्यवस्था रहेको कम्पनीले जनाएको छ ।
