छिमेक लघुवित्त वित्तीय संस्थाले संस्थापक समूहतर्फको सेयर बिक्रीमा ल्याएको छ । संस्थापक सेयरधनी चोलराज शर्मा जोशी र अभय बहादुर शाहको नाममा रहेको सेयर बिक्रीका लागि संस्थाले गोप्य शिलबन्दी बोलपत्र आह्वान गरेको हो ।
चोलराज शर्माको नाममा रहेको ५० हजार कित्ता सेयर र अभय बहादुरको नाममा रहेको १९ हजार कित्ता गरी कुल ६९ हजार कित्ता सेयर बिक्रीमा ल्याएको हो ।

संस्थाले उक्त सेयरको न्यूनतम मूल्य ४४५ रुपैयाँ तोकेको छ । उक्त सेयर खरिद गर्न चाहाने विद्यमान संस्थापक सेयरधनी वा जो कोही अन्य योग्य व्यक्ति वा संघ संस्थाहरुले चैत १२ गतेसम्म आवेदन दिन सक्नेछन् ।

इच्छुक आवेदकले तोकेको मूल्य वा सो भन्दा बढीमा उक्त सेयर खरिद गर्न सक्नेछन् । आवेदकले न्यूनतम ५ हजार कित्ताका लागि आवेदन दिनुपर्नेछ ।

बोलपत्र फाराम एनआइसी एशिया क्यापिटल लिमिटेडको कार्यालय ट्रेड टावर थापाथलीमा बुझाउनुपर्नेछ ।

कालिन्चोक हाइड्रोपावर लिमिटेडको आइपीओमा आवेदन दिने अवधि लम्बिएको छ । कम्पनीले फागुन १३ गतेदेखि आयोजना प्रभावित क्षेत्रका स्थानिय बासिन्दाहरुका लागि निष्कासन तथा बिक्री खुला गरेको आईपीओमा अब चैत १२ गतेसम्म आवेदन दिन सकिने भएको छ ।
मागभन्दा बढी आवेदन परेमा सोभन्दा अगावै कुनै पनि दिन सूचना प्रकाशित गरि निष्कासन बन्द गरिने कम्पनीले जनाएको छ ।

कम्पनीले जारी पूँजी ५५ करोड रुपैयाँको २५ प्रतिशत अर्थात १३ करोड ७५ लाख रुपैयाँ बराबरको १३ लाख ७५ हजार कित्ता सेयर निष्काशन गर्ने अनुमति पाएको थियो । जसमध्ये ५ करोड ५० लाख रुपैयाँबराबरको प्रतिशेयर १०० रुपैयाँ दरका ५ लाख ५० हजार कित्ता साधारण सेयर आयोजना प्रभावित क्षेत्रका स्थानिय बासिन्दाहरुका लागि निष्काशन गरेको हो ।

सो सेयर खरिदका लागि दोलखा जिल्ला, बिगु नगरपालिका वडा नं. ८ तथा कालिन्चोक गाउँपालिका वडा नं. १ र २ का स्थानिय बासिन्दाहरुले आवेदन दिन सक्नेछन् ।

सो आईपीओमा न्यूनतम १० कित्ताका लागि आवेदन दिनुपर्नेछ भने अधिकतममा १० हजार कित्ताका लागि आवेदन दिन सकिनेछ ।

कम्पनीको सेयर निष्कासन तथा बिक्री प्रबन्धकमा आरबिबि मर्चेन्ट बैंकिङ्ग लिमिटेड रहेको छ ।

स्थानिय बासिन्दाले बिक्री प्रबन्धकका साथै कालिन्चोक हाइड्रोपावर, बिगु गाउँपालिका ८, नेपाल बैंक, सिन्धु विकास बैंक र नेपाल इन्भेष्टमेन्ट बैंकको सिङगटी शाखा कार्यालयबाट आवेदन दिन सक्नेछन् । आयोजना प्रभावित क्षेत्रका बासिन्दाहरुले सेयर खरिद दरखास्त फाराम प्राप्त गर्नका लागि २ रुपैयाँ शुल्क बुझाउनु पर्नेछ ।

ग्रीनलाइफ हाइड्रोपावर लिमिटेडले चालु आवको दोस्रो त्रैमासिक वित्तीय विवरण आज सार्वजनिक गरेको छ । कम्पनीले सो अवधिसम्म १ करोड ८८ लाख ४ हजार रुपैयाँ खुद नाफा कमाएको छ ।

कम्पनीले कमाएको यो नाफा गत आवको सोही अवधिसम्मको तुलनामा २४.७४ प्रतिशत बढी हो । गत आवको दोस्रो त्रैमाससम्म कम्पनीले १ करोड ५० लाख ७४ हजार रुपैयाँ नाफा कमाएको थियो ।

कम्पनीको आम्दानीमा सुधार देखिएसँगै नाफा बढ्न टेवा पुगेको हो । कम्पनीको आम्दानी ७.३५ प्रतिशतले बढेर ५ करोड २६ लाख ४२ हजार पुगेको छ । गत आवको सोही अवधिसम्म भने कम्पनीको आम्दानी ४ करोड ९० लाख ३९ हजार रुपैयाँ रहेको थियो ।

कम्पनीको प्रतिसेयर आम्दानी (इपीएस) १.६७ रुपैयाँबाट बढेर २.०९ रुपैयाँ पुगेको छ भने नेटवर्थ १०८.१९ रुपैयाँबाट बढेर ११०.७७ रुपैयाँ पुगेको छ ।

त्यस्तै, कम्पनीका पीई रेसियो १४६.१६ गुणाबाट घटेर ११९.६६ गुणा, तरलता अनुपात ०.१४ प्रतिशतबाट ०.०३ प्रतिशत कायम भएको छ ।

रिज लाइन इनर्जी लिमिटेडको आईपीओ बाँडफाँड भएको छ । कम्पनीले सर्वसाधारणका लागि जारी गरेको आईपीओ धितोपत्र बिक्री प्रबन्धक प्रभु क्यापिटलले काठमाण्डौमा रहेको होटल मार्कोपोलोमा आज बिहान बाँडफाँड गरेको हो ।

कम्पनीले गत माघ २८ गतेदेखि फागुन ४ गतेसम्म आम सर्वसाधारणका लागि ११ लाख ८० हजार २६० कित्ता सेयर जारी गरेको थियो ।

क्यापिटलका अनुसार कम्पनीको आईपीओमा कुल २७ लाख २३ हजार ९१४ जनाले आवेदन दिएका छन् । यसमध्ये २५ लाख ३७ हजार ३०१ आवेदन सदर भएको छ ।

कुल सदर आवेदकमध्ये १ लाख १८ हजार २६ जनालाई १० कित्ताका दरले ११ लाख ८० हजार २६० कित्ता सेयर बाँडफाँड गरिएको छ । बाँकी आवेदकको हात भने खाली भएको छ ।

यो आईपीओमा मागभन्दा बढी आवेदन परेकाले आईपीओ बाँडफाँड गोलाप्रथा विधिबाट गरिएको थियो ।

आईपीओको नतिजा मेरो सेयर तथा सिडिएस एण्ड क्लियरिङको वेबसाइटमार्फत हेर्न सकिनेछ ।

आईसीएफसी फाइनान्स लिमिटेडको ऋणपत्रमा आवेदन दिने आज अन्तिम दिन रहेको छ । कम्पनीले गत फागुन ११ गतेदेखि निष्कासन गरेको कुल ५० करोड रुपैयाँबराबरको ऋणपत्रमा आवेदन दिने आज अन्तिम दिन रहेको हो। कम्पनीले प्रतिकित्ता १ हजार रुपैयाँ अंकित दरका कुल ५ लाख कित्ता ‘८ प्रतिशत आईसीएफसी फाइनान्स लिमिटेड डिबेञ्चर’ जारी गरेको छ।
निष्कासन गरिएको कुल ऋणपत्रमध्ये ३ लाख कित्ता व्यक्तिगत तवरबाट बिक्री गरिनेछ भने बाँकी २ लाख कित्ता सर्वसाधारणका लागि सार्वजनिक निष्कासनमार्फत उपलब्ध गराइने कम्पनीले जनाएको छ। सार्वजनिक निष्कासनमध्ये ५ प्रतिशत अर्थात १० हजार कित्ता सामूहिक लगानी कोषका लागि छुट्याइएको छ।

७ वर्ष अवधिको उक्त ऋणपत्रमा लगानीकर्ताले वार्षिक ८ प्रतिशत ब्याज प्राप्त गर्नेछन्।

लगानीकर्ताले सि–आस्बा सेवामा सहभागी बैंक तथा वित्तीय संस्था र तिनका शाखा कार्यालयमार्फत आवेदन दिन सक्नेछन्। इच्छुक लगानीकर्ताले न्यूनतम २५ कित्ता र अधिकतम २ लाख कित्तासम्म आवेदन दिन सक्ने व्यवस्था गरिएको छ।

उक्त ऋणपत्रको निष्कासन तथा बिक्री प्रबन्धकको जिम्मेवारी कुमारी क्यापिटल लिमिटेडलाई दिइएको छ। कम्पनीले नेपाल धितोपत्र बोर्डबाट गत माघ २१ गते ऋणपत्र निष्कासनका लागि अनुमति प्राप्त गरेको थियो।

नेपाल राष्ट्र बैंकले बैंकिङ प्रणालीमा भएको अधिक तरलता व्यवस्थापनका लागि आज ४० अर्ब रुपैयाँ झिक्न लागेको छ । केन्द्रीय बैंकले अल्पकालिन उपकरण निक्षेप संकलनमार्फत ८८ दिनका लागि उक्त रकम झिक्न लागेको हो ।

राष्ट्र बैंकले अनलाइन बिडिङ सिस्टममार्फत आज मध्यान्ह ३ बजेसम्म अनलाइन बिडिङमार्फत बोलकबोल गर्न सकिने जनाएको छ ।

इच्छुक बैंक तथा वित्तीय संस्थाले घटीमा १० करोड रुपैयाँ र बढीमा ५ करोड रुपैयाँले भाग गर्दा निःशेष भाग जाने गरी कुल आह्वान रकमसम्मका लागि आवेदन दिन सक्नेछन् । यसको साँवा तथा ब्याज भुक्तानी २०८३ जेठ १० गते हुनेछ ।

निक्षेप संकलनमा नेपाल राष्ट्र बैंकबाट इजाजत प्राप्त क,ख र ग वर्गका बैंक तथा वित्तीय संस्थाले सहभागिता जनाउन सक्नेछन् ।

टक्सार पिखुवा खोला हाइड्रोपावर लिमिटेडले यही फागुन २७ गतेदेखि प्रारम्भिक सार्वजनिक निष्कासन (आईपीओ) खुला गर्ने भएको छ। कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपाली नागरिकहरूका लागि पहिलो चरणमा आईपीओ निष्कासन गर्न लागेको हो।

कम्पनीले गत फागुन १ गते नेपाल धितोपत्र बोर्डबाट आफ्नो जारी पूँजीको ३५.२६ प्रतिशत बराबर ४२ करोड ३० लाख ६६ हजार ८ सय रुपैयाँको रु. १०० अंकित दरका ४२ लाख ३० हजार ६६८ कित्ता साधारण सेयर निष्कासन गर्न अनुमति पाएको थियो।

स्वीकृत विवरणपत्रअनुसार जारी पूँजीको १० प्रतिशत अर्थात १२ करोड रुपैयाँ बराबरका १२ लाख कित्ता साधारण सेयर आयोजना प्रभावित क्षेत्रका स्थायी बासिन्दाका लागि छुट्याइएको छ। यसअन्तर्गत भोजपुर जिल्लाका बासिन्दाले आवेदन दिन सक्नेछन्।

त्यसैगरी, सार्वजनिक निष्कासन गरिने सेयरको १० प्रतिशत अर्थात ३ करोड ३ लाख ६ हजार ७०० रुपैयाँ बराबरका ३ लाख ३ हजार ६७ कित्ता सेयर श्रम स्वीकृति प्राप्त गरी वैदेशिक रोजगारीमा रहेका नेपाली नागरिकहरूका लागि छुट्याइएको छ।

यस्तै, ५ प्रतिशत अर्थात १ करोड ५१ लाख ५३ हजार ३०० रुपैयाँ बराबरका १ लाख ५१ हजार ५३३ कित्ता सेयर सामूहिक लगानी कोषका योजनाहरूका लागि र २ प्रतिशत अर्थात ६० लाख ६१ हजार ३०० रुपैयाँ बराबरका ६० हजार ६१३ कित्ता सेयर कर्मचारीहरूका लागि सुरक्षित गरिएको छ। बाँकी रहेको २५ लाख १५ हजार ४५५ कित्ता साधारण सेयर दोस्रो चरणमा सर्वसाधारणका लागि बिक्री गरिने कम्पनीले जनाएको छ।

आयोजना प्रभावित क्षेत्रका बासिन्दाले न्यूनतम १० कित्ता र अधिकतम ५० हजार कित्तासम्म आवेदन दिन सक्नेछन्। वैदेशिक रोजगारीमा रहेका नेपालीहरूले पनि न्यूनतम १० कित्ता र अधिकतम ५० हजार कित्तासम्म आवेदन दिन पाउनेछन्।

आयोजना प्रभावित क्षेत्रका लागि आईपीओ निष्कासन छिटोमा चैत ११ गते र ढिलोमा चैत २६ गते बन्द हुनेछ। वैदेशिक रोजगारीमा रहेका नेपालीका लागि भने छिटोमा चैत १ गते र ढिलोमा चैत ११ गतेसम्म आवेदन खुला रहनेछ।

आवेदन प्रक्रिया अन्तर्गत आयोजना प्रभावित क्षेत्रका बासिन्दाले भोजपुरस्थित कम्पनीको कार्यालय, प्रभु बैंकका भोजपुर, प्याउली र हटुवागढी शाखा, सिटिजन्स बैंकको भोजपुर शाखा तथा कमलादीस्थित प्रभु क्यापिटल लिमिटेडबाट आवेदन दिन सक्नेछन्।

वैदेशिक रोजगारीमा रहेका नेपालीहरूले भने धितोपत्र बोर्डबाट स्वीकृत सम्पूर्ण आस्वा सदस्य बैंक तथा वित्तीय संस्था र तिनका तोकिएका शाखा कार्यालयमार्फत तथा ‘मेरो सेयर’ अनलाइन प्रणालीबाट समेत आवेदन दिन सक्ने व्यवस्था गरिएको छ।

कम्पनीको आईपीओ निष्कासन तथा बिक्री प्रबन्धकका रूपमा प्रभु क्यापिटल लिमिटेड रहेको छ। पहिलो चरणअन्तर्गत आयोजना प्रभावित क्षेत्र र वैदेशिक रोजगारीमा रहेका नेपालीका लागि सेयर निष्कासन सम्पन्न भएपछि दोस्रो चरणमा सर्वसाधारणका लागि २५ लाख १५ हजार ४५५ कित्ता आईपीओ जारी गरिनेछ।

कालिञ्चोक हाइड्रोपावर लिमिटेडले आजदेखि सर्वसाधारणका लागि प्रारम्भिक सार्वजनिक निष्कासन (आईपीओ) खुला गरेको छ। कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपाली नागरिकहरूलाई लक्षित गरी आईपीओ निष्कासन सुरु गरेको हो।

कम्पनीले गत माघ १९ गते नेपाल धितोपत्र बोर्डबाट रु. १०० अंकित दरका १३ लाख ७५ हजार कित्ता साधारण सेयर निष्कासन गर्न अनुमति पाएको थियो। उक्त सेयरको कुल मूल्य १३ करोड ७५ लाख रुपैयाँ बराबर रहेको छ।

कम्पनीको कुल जारी पूँजी रु. ५५ करोड रहेको छ। सो पूँजीको २५ प्रतिशत बराबर १३ करोड ७५ लाख रुपैयाँको आईपीओ सर्वसाधारणमा निष्कासन गरिएको हो। यसमध्ये जारी पूँजीको १० प्रतिशत अर्थात् ५ करोड ५० लाख रुपैयाँ बराबरका ५ लाख ५० हजार कित्ता साधारण सेयर आयोजना प्रभावित क्षेत्रका स्थानीय बासिन्दाका लागि छुट्याइएको छ।

आयोजना प्रभावित क्षेत्रअन्तर्गत दोलखा जिल्लाको विगु गाउँपालिका वडा नं. ८ तथा कालिन्चोक गाउँपालिका वडा नं. १ र २ का बासिन्दाले आवेदन दिन सक्नेछन्।

यस्तै, बाँकी ८ लाख २५ हजार कित्तामध्ये १० प्रतिशत अर्थात् ८२ हजार ५०० कित्ता साधारण सेयर नेपाल सरकारको सम्बन्धित निकायबाट श्रम स्वीकृति प्राप्त गरी वैदेशिक रोजगारीमा रहेका नेपाली नागरिकहरूका लागि निष्कासन गरिएको छ।

आयोजना प्रभावित क्षेत्रका बासिन्दाले न्यूनतम १० कित्ता र अधिकतम १० हजार कित्तासम्म आवेदन दिन सक्नेछन्। वैदेशिक रोजगारीमा रहेका नेपालीहरूले न्यूनतम १० कित्ता र अधिकतम ४ हजार कित्तासम्म आवेदन दिन पाउनेछन्।

आयोजना प्रभावित क्षेत्रका लागि आईपीओ निष्कासन छिटोमा फागुन २७ गते र ढिलोमा चैत १२ गते बन्द हुनेछ। वैदेशिक रोजगारीमा रहेका नेपालीका लागि भने छिटोमा फागुन १७ गते र ढिलोमा फागुन २७ गतेसम्म आवेदन खुला रहने कम्पनीले जनाएको छ।