बैंक तथा वित्तीय संस्थाहरूको निक्षेप ६६ खर्ब भन्दा बढी भएको छ ।

नेपाल राष्ट्र बैंकको अनुसार मंसिर ३० गतेसम्म बैंकिङ प्रणालीमा ६६ खर्ब ७६ अर्ब रुपैयाँ निक्षेप रहेको छ ।

यो अवधीमा वाणिज्य बैंकहरुको कुल निक्षेप बढेर ५९ खर्ब ३७ अर्ब रुपैयाँ पुगेको छ।

त्यस्तै मंसिर २९ गतेसम्म ५३ खर्ब ३१ अर्ब रुपैयाँ कर्जा प्रवाह भएकोमा ३० गतेसम्म ५३ खर्ब ३३ अर्ब रुपैयाँ बराबरको कर्जा प्रवाह भएको छ ।

यस अबधिमा बैंकहरुको औसत सिडी रेसियो ७८.७८ प्रतिशत रहेको छ। त्यस्तै, अन्तर बैंक ब्याजदर २.९९ प्रतिशत छ ।

नेपाल बैंकर्स संघको अध्यक्षमा सन्तोष कोइराला निर्विरोध निर्वाचित भएका छन् ।

वाणिज्य बैंकहरुको प्रमुख कार्यकारी अधिकृतको संस्थाको रूपमा रहेको संघमा आगामी कार्यकालको लागि अध्यक्षमा कोइरालाको एकल उम्मेदवारी परेको हो ।

मंगलबार अध्यक्षका अर्को प्रत्यासी अशोक शेरचनले उम्मेदवारी दिए पनि पछी फिर्ता लिएका थिए । त्यसैले माछापुच्छ्रे बैंकका प्रमुख कार्यकारी अधिकृत कोइराला निर्विरोध अध्यक्ष बनेका हुन् । गत साता संघको अध्यक्षका लागि प्रभु बैंकका प्रमुख कार्यकारी अधिकृत शेरचन र माच्छापुच्छ्रे बैंकका प्रमुख कार्यकारी अधिकृत कोइरालाले उम्मेद्वारी दर्ता गराएका थिए ।

मुक्तिनाथ विकास बैंक लिमिटेडले सेयरधनीहरुलाई लाभांश नदिने निर्णय गरेको छ । पुस १ गते बसेको बैंकको सञ्चालक समितिको बैठकले आर्थिक वर्ष २०८०/८१ को वितरणयोग्य मुनाफाबाट लाभांश नदिने निर्णय गरेको हो ।

बैठकले सो अवधिको वितरणयोग्य मुनाफाबाट लाभांश नदिई सञ्चित मुनाफा खातामा राख्ने र सोही अनुसारको वित्तीय विवरण स्वीकृतीका लागि नेपाल राष्ट्र बैंकमा पेश गर्ने निर्णय गरेको छ । राष्ट्र बैंकबाट स्वीकृत भएपश्चात उक्त वित्तीय विववरण बैंकको. आगामी १८ औं वार्षिक साधारण सभाबाट पारित गरिनेछ ।