कामना सेवा विकास बैंक लिमिटेडले संस्थापक समूहको सेयर बिक्रीमा राखेको छ । बैंकले ३३ हजार ८५२ कित्ता संस्थापक सेयर आजदेखि बिक्रीमा राखेको हो ।

यो सेयर खरिदका लागि जो कोही व्यक्ति तथा कम्पनीले खरिद आवेदन दिन सक्नेछन् । सेयर खरिद गर्न चाहने लगानीकर्ताले सूचना प्रकाशित भएको ७ दिनभित्र काठमाण्डौको ज्ञानेश्वरमा रहेको बैंकको केन्द्रीय कार्यालयमा आवेदन दिनुपर्नेछ । आवेदन पेश गर्दा के–कति सेयर खरिद गर्न चाहेको हो सो को व्यहोरा खुलाउनु पर्नेछ ।

बैंकले यसअघि गत मंसिर २६ गते संस्थापक सेयरधनीहरुका लागि ३५ दिने सूचना जारी गर्दै यो सेयर बिक्रीमा राखेको थियो । तर उक्त समयभित्र कुनै आवेदन नपरेकाले आम सर्वसाधारणलाई बिक्री गर्न लागिएको बैंकल जनाएको छ ।

पाँचथर पावर कम्पनी लिमिटेडले हकप्रद निष्कासनको विशेष प्रस्तावसहित साधारण सभा आयोजना गर्ने भएको छ । माघ २ गते बसेको कम्पनीको सञ्चालक समितिको बैठकले नवौं साधारण सभाको मिति निर्धारण गरेको हो ।

बैठकले उक्त सभा यही माघ २४ गते काठमाण्डौको बत्तिसपुतलीमा रहेको होटल इम्पेरियलमा बिहान ११ बजेदेखि सुरु गर्ने निर्णय गरेको हो । उक्त सभामा कम्पनीको हाल कायम रहेको चुक्तापूँजीको शतप्रतिशत अर्थात १ः१ अनुपातमा हकप्रद सेयर निष्काशन गर्ने सम्बन्धमा विद्युत नियमन आयोगबाट पूर्व स्वीकृति लिई (विद्युत नियमन आयोगमा पूर्व स्वीकृतिको लागि निवेदन पेश गरिएको) हकप्रद सेयर निष्काशन गर्ने र सो अनुसार प्राप्त हुने रकमको उपयोग बारेमा सञ्चालक समितिले गरेको निर्णय पारित गर्ने र अधिकृत, जारी तथा चुक्ता पूँजी बृद्धि गर्ने गरि प्रवन्धपत्रमा आवश्यक संशोधन गर्ने विशेष प्रस्ताव पारित गरिनेछ ।

यस्तै सञ्चालक समितिको आर्थिक वर्ष २०८०/८१को प्रतिवेदनमासथ छलफल गरी पारित गर्ने , लेखापरीक्षकद्वारा प्रस्तुत आर्थिक वर्ष २०८०/८१ को लेखापरीक्षण प्रतिवेदन, वासलात, नाफा नोक्सान हिसाव तथा नगद प्रवाह विवरण लगायत सोसंग सम्वन्धित अनुसुचीहरुमाथि छलफल गरि पारित गर्ने, आर्थिक वर्ष २०८१/८२ को लागी लेखापरीक्षकको नियुक्ति र पारिश्रमिक निर्धारण गर्ने र सञ्चालकहरुको निर्वाचन गर्ने प्रस्तावहरु समेत पारित गरिनेछ ।

साधारण सभा प्रयोजनका लागि कम्पनीले माघ ११ गते एक दिनका लागि बुक क्लोज गर्ने निर्णय गरेको छ । यसर्थ माघ १० गतेसम्म नेप्सेमा कारोबार भई कायम भएका सेयरधनीहरु मात्रै सभामा सहभागी हुन योग्य हुनेछन् ।

अन्तराष्ट्रिय बजारमा सुनको मूल्य बढेको छ । आज सुनको मूल्य १.०६ प्रतिशत अर्थात २८.३९ प्रतिशतले बढेको छ ।

यो सङ्गै सुनको मूल्य प्रतिऔंस २ हजार ६९७ डलर पुगेको छ ।

डलरको मूल्य ०.१ प्रतिशतले घटेको छ । जसका कारण अन्य मुद्रा भएका लगानीकर्ताहरुले सुनमा लगानी बढाएका छन् ।

आज चाँदीको मूल्य पनि बढेको छ । चाँदीको मूल्य आज ०.९४ डलरले बढ्दै प्रतिऔंस ३०.६९ डलर कायम भएको छ ।

इमर्जिङ नेपाल लिमिटेडको सञ्चालकमा ४ जना निर्वाचित भएका छन् । पुस २९ गते सम्पन्न कम्पनीको नवौं वार्षिक साधारण सभाबाट ४ जना सञ्चालक निर्वाचित भएका हुन् ।

नवनिर्वाचित हुने सञ्चालकमा लालमणी जोशी, अशोक कुमार अग्रवाल,विनोद आत्रेय र चन्द्र टण्डन रहेका छन् ।

साधारण सभा सम्पन्न भएपश्चात सोही दिन बसेको कम्पनीको सञ्चालक समितिको बैठकले लालमणी जोशीलाई सञ्चालक समितिको अध्यक्ष नियुक्त गरेको छ । नवनियुक्त अध्यक्षले सञ्चालक समिति समक्ष र अन्य सञ्चालकले अध्यक्ष समक्ष पद तथा गोपनियताको सपथ लिएको कम्पनीले जनाएको छ