हिमालयन लघुवित्त वित्तीय संस्था लिमिटेडले चालु आर्थिक वर्षको दोस्रो त्रैमाससम्म २ करोड ६० लाख रुपैयाँ खुद नाफा कमाउन सफल भएको छ। यो नाफा अघिल्लो वर्षको सोही अवधिको तुलनामा ३९५.६८ प्रतिशतले वृद्धि भएको हो। गत वर्ष यसै अवधिसम्म संस्थाले ५२ लाख ५८ हजार रुपैयाँ नाफा आर्जन गरेको थियो।

समीक्षा अवधिसम्म संस्थाको खुद ब्याज आम्दानी ३०.७१ प्रतिशतले वृद्धि भई १५ करोड ३३ लाख रुपैयाँ पुगेको छ। त्यस्तै, संस्थाले खुद शुल्क तथा कमिशन आम्दानीबाट १८ करोड २९ लाख रुपैयाँ आर्जन गरेको छ। कुल सञ्चालन आम्दानी पनि १४ करोड २ लाख रुपैयाँबाट बढेर १७ करोड ४० लाख रुपैयाँ पुगेको छ।

यो अवधिमा संस्थाको इम्पेयरमेन्ट चार्ज बढेर १ करोड १७ लाख रुपैयाँ पुगेको छ, जबकि अघिल्लो वर्षको दोस्रो त्रैमासमा यो ७८ लाख ३१ हजार रुपैयाँ थियो। तर, संस्थाको वितरणयोग्य मुनाफा भने २९ लाख ६० हजार रुपैयाँले ऋणात्मक रहेको छ।

संस्थाले ग्राहकहरूबाट १ अर्ब १ करोड रुपैयाँ निक्षेप संकलन गरेको छ भने ४ अर्ब ६९ करोड रुपैयाँ कर्जा प्रवाह गरेको छ। तर, खराब कर्जा अनुपात ३.५९ प्रतिशतबाट बढेर ५.६२ प्रतिशतमा पुगेको छ। संस्थाको रिजर्भ १२ करोड रुपैयाँ रहेको छ।

समीक्षा अवधिसम्म संस्थाको प्रति शेयर आम्दानी (EPS) १६.३० रुपैयाँ, मूल्य आम्दानी अनुपात (P/E Ratio) ५७.८६ गुणा, प्रति शेयर नेटवर्थ १२३.३७ रुपैयाँ, प्रति शेयर कुल सम्पत्तिको मूल्य १,८९२.२९ रुपैयाँ, र तरलता अनुपात २३.४९ गुणा रहेको छ।

क्रेष्ट माइक्रो लाइफ इन्स्योरेन्स लिमिटेडले वैदेशिक रोजगारीमा रहेका नेपाली नागरिकहरूका लागि आजदेखि आईपीओ जारी गर्न लागेको छ। कम्पनीले अनुमति प्राप्त २२ लाख ५० हजार कित्ता शेयरमध्ये १० प्रतिशत अर्थात् २ लाख २५ हजार कित्ता शेयर वैदेशिक रोजगारीमा रहेका नेपालीका लागि छुट्याएको छ। यस शेयरको मूल्य प्रति कित्ता १०० रुपैयाँ तोकिएको छ।

कम्पनीले कुल आईपीओमा ३ प्रतिशत अर्थात् ६७ हजार ५०० कित्ता शेयर आफ्ना कर्मचारीहरूका लागि र ५ प्रतिशत अर्थात् १ लाख १२ हजार ५०० कित्ता शेयर सामूहिक लगानी कोषका लागि सुरक्षित राखी बाँकी १८ लाख ४५ हजार कित्ता शेयर सर्वसाधारणका लागि जारी गर्ने योजना बनाएको छ।

वैदेशिक रोजगारीमा रहेका नेपालीहरूले धितोपत्र बोर्डबाट अनुमोदित सबै आस्वा सदस्य बैंक तथा वित्तीय संस्थाका शाखा कार्यालयहरूमार्फत वा मेरो सेयर अनलाइन प्लेटफर्ममार्फत आवेदन दिन सक्नेछन्।

यस आईपीओको निष्कासन तथा बिक्री प्रबन्धकको जिम्मेवारी एनआईएमबीएस क्यापिटल लिमिटेडले लिएको छ। लगानीकर्ताहरूले न्यूनतम १० कित्तादेखि अधिकतम १० हजार कित्तासम्मका लागि आवेदन दिन सक्नेछन्, जसको म्याद माघ २९ गतेसम्म छ।

कम्पनीले नेपाल धितोपत्र बोर्डबाट माघ ३ गते आईपीओ जारी गर्न स्वीकृति पाएको थियो। यस अन्तर्गत पहिलो चरणमा कम्पनीले वैदेशिक रोजगारीमा रहेका नेपालीहरूका लागि शेयर जारी गर्न लागेको हो।

सामुदायिक लघुवित्त वित्तीय संस्था लिमिटेडले ११ औं साधारण सभा आगामी फागुन ६ गते आयोजना गर्ने भएको छ । माघ १३ गते बसेको संस्थाको सञ्चालक समितिको बैठकले उक्त सभा काभ्रेको पनौतीमा रहेको स्काई गार्डेन रिसोर्टमा बिहान ११ बजेदेखि सुरु गर्ने निर्णय गरेको हो ।

उक्त सभामा कम्पनीको हाल संस्थापक सेयर समुह र सर्वसाधरण समुहको सेयर क्रमशः ६९.६५ र ३०.३५ रहेकोमा साविक सामुदायिक लघुवित्त वित्तीय संस्था लिमिटेडको संस्थापक सेयरधनीको नाममा रहेको संस्थापक सेयर मात्र संस्थाको कुल चुक्तापूँजीको ८.५४ प्रतिशतले सर्वसाधरण सेयरमा परिवर्तन गरी संस्थापक सेयरधनीको तर्फबाट ६१.११ प्रतिसत र सर्वसाधरण समुहको तर्फबाट ३८.८९ प्रतिसत सेयर स्वामित्व हुने गरी पूँजी संरचना परिवर्तन गर्ने र सोही बमोजिम सञ्चालकको प्रतिनिधित्व हुने गरी व्यवस्था गर्ने विशेष प्रस्ताव पारित गरिनेछ ।

यस्तै संस्थाको केन्द्रीय कार्यालयको ठेगाना बागमती प्रदेश काभ्रेपलाञ्चोक जिल्ला, बनेपा नगरपालिका वडा नं. १४ मा कायम गर्ने सम्बन्धमा प्रबन्धपत्र र नियमावलीमा आवश्यक संशोधन गर्ने प्रस्ताव समेत पारित गरिनेछ ।

सभामा सञ्चालक समितिको तर्फबाट अध्यक्षले प्रस्तुत गर्ने आर्थिक वर्ष २०८०/८१ को वार्षिक प्रतिवेदन उपर छलफल गरी पारित गर्ने, आर्थिक वर्ष २०८०/८१ को लेखा परीक्षकको प्रतिवेदन सहित २०८१ असार मसान्त सम्मको वासलात तथा आर्थिक वर्ष २०८०/८१ को नाफा र नोक्सान हिसाब, नगद प्रवाह विवरण लगायतका विवरण तथा अनुसूचीहरु छलफल गरी पारित गर्ने, आर्थिक वर्ष २०८१/८२ को लेखा परीक्षण गर्न लेखा परीक्षक नियुक्त गर्ने र निजको पारिश्रमिक निर्धारण गर्ने र कम्पनीको सञ्चालक समितिमा प्रतिनिधित्व गर्ने संस्थापक सेयरधनीतर्फको ४ जना र सर्वसाधारण सेयरधनी तर्फको २ जना गरी ६ जना सञ्चालकको निर्वाचन गर्ने प्रस्ताव समेत पारित गरिनेछ ।

साधारण सभा प्रयोजनका लागि संस्थाले माघ २५ गते एक दिनका लागि बुक क्लोज गर्ने निर्णय गरेको छ । यसर्थ माघ २४ गतेसम्म नेप्सेमा कारोबार भई कायम भएका सेयरधनीहरु मात्रै संस्थाको सभामा सहभागी हुन योग्य हुनेछन् ।