चालु आर्थिक वर्षको दोस्रो त्रैमाससम्म समृद्धि फाइनान्स कम्पनी लिमिटेडले ६ करोड २८ लाख रुपैयाँ घाटा बेहोरेको छ, जसले अघिल्लो आर्थिक वर्षको सोही अवधिको तुलनामा १९४.३२ प्रतिशतले वृद्धि भएको छ। अघिल्लो वर्ष यो घाटा २ करोड १३ लाख रुपैयाँ थियो।

समीक्षा अवधिमा कम्पनीको खुद ब्याज आम्दानी भने सुधारिएको छ। ८.१२ प्रतिशतले बढ्दै यो ३ करोड ८७ लाख रुपैयाँ पुगेको छ। तर, अघिल्लो वर्ष पुस मसान्तसम्म ३ करोड ७४ लाख रुपैयाँ सकारात्मक रहेको खुद सञ्चालन आम्दानी यस वर्ष ९९ लाख १८ हजार रुपैयाँले ऋणात्मक भएको छ।

कम्पनीले कर्मचारी खर्चका लागि ३ करोड २९ लाख रुपैयाँ र अन्य सञ्चालन खर्चका लागि १ करोड ६३ लाख रुपैयाँ खर्च गरेको छ। साथै, इम्पेयरमेन्ट चार्जका लागि ६ करोड १२ लाख रुपैयाँ छुट्याएको छ, जबकि अघिल्लो वर्ष यो रकम ६२ करोड ५३ लाख रुपैयाँ थियो।

कम्पनीको रिटेन्ड अर्निङ ६८ करोड १ लाख रुपैयाँले ऋणात्मक छ, भने रिजर्भको आकार २५ करोड २६ लाख रुपैयाँमा सीमित छ।

कम्पनीले २ अर्ब ५८ करोड रुपैयाँबराबरको निक्षेप संकलन गरेको छ र १ अर्ब ५७ करोड रुपैयाँबराबरको कर्जा प्रवाह गरेको छ। तर, खराब कर्जा अनुपात ४.६८ प्रतिशतबाट बढेर १९.३४ प्रतिशत पुगेको छ।

कम्पनीको वितरणयोग्य मुनाफा ६८ करोड १ लाख रुपैयाँले ऋणात्मक छ भने प्रतिसेयर आम्दानी (ईपीएस) ३०.६९ रुपैयाँले नकारात्मक रहेको छ।

गोर्खाज फाइनान्स लिमिटेडले चालु आर्थिक वर्षको दोस्रो त्रैमासको अपरिष्कृत वित्तीय विवरण सार्वजनिक गरेको छ, जसअनुसार कम्पनी २५ लाख ९८ हजार रुपैयाँ घाटामा गएको छ। अघिल्लो आर्थिक वर्षको दोस्रो त्रैमाससम्म कम्पनीले १२ करोड १६ लाख रुपैयाँ खुद नाफा कमाएको थियो।

कम्पनीको खुद ब्याज आम्दानीमा पनि १९ प्रतिशतको कमी आएको छ। अघिल्लो वर्ष १८ करोड ३० लाख रुपैयाँ रहेको खुद ब्याज आम्दानी घटेर यस वर्ष १४ करोड ८२ लाख रुपैयाँमा सीमित भएको छ।

कम्पनीले ८ करोड ३० लाख रुपैयाँ इम्पेयरमेन्ट चार्जका लागि छुट्याएको छ। यस अवधिमा कम्पनीको खुद सञ्चालन आम्दानी ३२ करोड ९४ लाख रुपैयाँबाट घटेर १० करोड २० लाख रुपैयाँमा झरेको छ।

त्यस्तै, कम्पनीको रिटेन्ड अर्निङ ४७ करोड १५ लाख रुपैयाँले ऋणात्मक छ। कम्पनीको रिजर्भको आकार पनि घट्दै अघिल्लो वर्षको ९७ करोड २१ लाख रुपैयाँबाट ९४ करोड १७ लाख रुपैयाँमा सीमित भएको छ।

कम्पनीको वितरणयोग्य मुनाफा पनि ४७ करोड १५ लाख रुपैयाँले ऋणात्मक रहेको छ।

दोस्रो त्रैमाससम्म कम्पनीले ९ अर्ब ८० करोड रुपैयाँबराबरको निक्षेप संकलन गरेको छ भने ६ अर्ब २६ करोड रुपैयाँ कर्जा प्रवाह गरेको छ।

समीक्षा अवधिसम्म कम्पनीको प्रतिसेयर आम्दानी (ईपीएस) ०.६० रुपैयाँ ऋणात्मक छ। प्रतिसेयर नेटवर्थ १५६.०८ रुपैयाँ, प्रतिसेयर कुल सम्पत्तिको मूल्य १,३१७.८३ रुपैयाँ, र तरलता अनुपात ३४.२७ प्रतिशत छ।

मितेरी डेभलपमेन्ट बैंकको नाफा खुद ब्याज आम्दानीमा कमीका कारण प्रभावित भएको छ। चालु आर्थिक वर्षको दोस्रो त्रैमासिक प्रतिवेदनअनुसार बैंकको नाफा ४७.०४ प्रतिशतले घटेको छ। अघिल्लो आर्थिक वर्षको दोस्रो त्रैमाससम्म ४ करोड ८८ लाख रुपैयाँ नाफा गरेको बैंकले यो वर्ष घटेर २ करोड ५८ लाख रुपैयाँमा सीमित भएको छ।

बैंकको खुद ब्याज आम्दानी ३५.५५ प्रतिशतले घट्दै ८ करोड ५८ लाख रुपैयाँमा झरेको छ। यसैगरी, बैंकको खुद सञ्चालन आम्दानी पनि १२ करोड ८२ लाख रुपैयाँबाट घटेर ९ करोड ९ लाख रुपैयाँमा खुम्चिएको छ।

१ अर्ब २१ करोड रुपैयाँ चुक्तापूँजी भएको बैंकको रिटेन्ड अर्निङ ५ करोड २४ लाख रुपैयाँ रहेको छ भने रिजर्भको आकार ३४ करोड ४३ लाख रुपैयाँ रहेको छ। यस अवधिमा बैंकले खराब कर्जा अनुपात घटाउन सफल भएको छ। अघिल्लो वर्ष २.७४ प्रतिशत रहेको खराब कर्जा अनुपात घटेर १.७४ प्रतिशतमा झरेको छ।

बैंकको वितरणयोग्य मुनाफा ५ करोड २४ लाख रुपैयाँ छ भने वार्षिक वितरणयोग्य प्रतिसेयर आम्दानी ४.९६ रुपैयाँ रहेको छ। समीक्षाको अवधिसम्म बैंकको प्रतिसेयर आम्दानी ४.२५ रुपैयाँ कायम भएको छ।

प्राइम कमर्सियल बैंकको खुद ब्याज आम्दानी बढेपनि खुद नाफामा कमी आएको छ। चालु आर्थिक वर्षको दोस्रो त्रैमाससम्म बैंकले १ अर्ब ८६ करोड रुपैयाँ खुद नाफा आर्जन गरेको छ, जुन अघिल्लो वर्षको सोही अवधिको तुलनामा १४.३४ प्रतिशतले कम हो।

गत वर्षको दोस्रो त्रैमाससम्म बैंकले २ अर्ब १८ करोड रुपैयाँ खुद नाफा आर्जन गरेको थियो। तर, यो वर्ष बैंकको खुद ब्याज आम्दानीमा वृद्धि भएको छ। खुद ब्याज आम्दानी ३ अर्ब ८७ करोड रुपैयाँबाट बढेर ४ अर्ब ४१ करोड रुपैयाँ पुगेको छ।

बैंकको कुल सञ्चालन आम्दानी ४ अर्ब ७७ करोड रुपैयाँ रहेको छ भने सञ्चालन मुनाफा ३ अर्ब १८ करोड रुपैयाँमा पुगेको छ। १९ अर्ब ४० करोड रुपैयाँ चुक्ता पूँजी भएको बैंकको रिटेन्ड अर्निङमा १ अर्ब ८४ करोड रुपैयाँ र रिजर्भमा १० अर्ब ३१ करोड रुपैयाँ रहेको छ।

ग्राहकहरूसँग २ खर्ब ३१ करोड रुपैयाँ निक्षेप संकलन गरेको बैंकले १ खर्ब ९७ अर्ब रुपैयाँ कर्जा प्रवाह गरेको छ। दोस्रो त्रैमाससम्म बैंकको वितरणयोग्य मुनाफा १ अर्ब ८४ करोड रुपैयाँ र वार्षिक वितरणयोग्य प्रतिसेयर आम्दानी १४.९८ रुपैयाँ रहेको छ।

समीक्षा अवधिसम्म बैंकको प्रतिसेयर आम्दानी (ईपीएस) १९.२८ रुपैयाँ, प्रतिसेयर कुल सम्पत्तिको मूल्य १ हजार ४९६.९७ रुपैयाँ, मूल्य-आम्दानी अनुपात १२.८१ गुणा, प्रतिसेयर नेटवर्थ २६.४३ प्रतिशत, र तरलता अनुपात २६.४३ प्रतिशत रहेको छ।