फागुन ११ गते आशा लघुवित्त वित्तीय संस्था लिमिटेडको लक–इन अवधि समाप्त हुने भएको छ। संस्थाको संस्थापक सेयरधनीहरु तथा कर्मचारीको लक इनमा राखिएको सेयरको लक–इन अवधि समाप्त हुन लागेको हो ।

संस्थाको संस्थापक सेयरधनीको स्वामित्वमा रहेको १९ लाख ९९ हजार ३७५ कित्ता र कर्मचारीको स्वामित्वमा रहेको १४ हजार ८५२ कित्ता गरी कुल २० लाख १४ हजार २२७.५० कित्ता सेयरको लक–इन अवधि समाप्त हुन लागेको संस्थाले जनाएको छ ।

कम्पनीले २०७८ फागुन ४ गतेदेखि ८ गतेसम्म सर्वसाधारण(कर्मचारी समेत) लाई आईपीओ निष्कासन गरेको थियो । सर्वसाधारणमा उक्त आईपीओ २०७८ फागुन १२ गते बाँडफाँड गरिएको थियो ।

लक–इन पिरियड समाप्त भएपछि यी सेयर दोस्रो बजारमा कारोबारमा आउनेछन् । तर संस्थाको संस्थापक सेयर सदस्यमध्ये सञ्चालक सदस्यमा रहेका व्यक्ति तथा संस्थाको उच्च तहमा रहेका कर्मचारीले भने सेयर खरिदबिक्री गर्न नपाउने कम्पनीले स्पष्ट पारेको छ ।

ओम मेगाश्री फर्मास्युटिकल्स लिमिटेडले माघ २१ गतेदेखि वैदेशिक रोजगारीमा रहेका नेपाली नागरिकहरूका लागि आईपीओ जारी गर्ने भएको छ। कम्पनीले कुल १८ लाख कित्ता सेयरमध्ये १० प्रतिशत अर्थात १ लाख ८० हजार कित्ता वैदेशिक रोजगारीमा रहेका नेपालीहरूका लागि छुट्याएको छ।

यसका साथै, कम्पनीले ३ प्रतिशत अर्थात् ५४ हजार कित्ता सेयर आफ्ना कर्मचारीहरूका लागि र ५ प्रतिशत अर्थात् ९० हजार कित्ता सामूहिक लगानी कोषका लागि छुट्याउने छ। बाँकी १४ लाख ७६ हजार कित्ता सेयर सर्वसाधारण लगानीकर्ताहरूका लागि जारी गरिनेछ।

वैदेशिक रोजगारीमा रहेका नेपालीहरूले यो आईपीओमा धितोपत्र बोर्डबाट स्वीकृत भएका सम्पूर्ण आस्वा सदस्य बैंक तथा वित्तीय संस्थाहरूको शाखा कार्यालयहरू वा “मेरो सेयर” अनलाइन प्लेटफर्ममार्फत आवेदन दिन सक्नेछन्।

यस आईपीओको निष्कासन र बिक्री प्रबन्धकको जिम्मेवारी प्रभु क्यापिटल लिमिटेडले लिएको छ। इच्छुक लगानीकर्ताहरूले फागुन ५ गतेसम्म आवेदन दिन सक्नेछन्। आवेदन दिने न्यूनतम सीमा १० कित्ता र अधिकतम १० हजार कित्तासम्म तोकिएको छ।

कम्पनीलाई क्रेडिट रेटिङ संस्था केयर रेटिङ नेपाल लिमिटेडले “केयर एनपी डबल बी माइनस” रेटिङ प्रदान गरेको छ। यसले समयमै वित्तीय दायित्व पूरा गर्न मध्यम स्तरको जोखिम रहेको संकेत गर्दछ।

हालैको पुस मसान्तसम्म कम्पनीको प्रतिसेयर आम्दानी (ईपीएस) ५.७३ रुपैयाँ, प्रतिसेयर नेटवर्थ ९८.११ रुपैयाँ र सञ्चित नाफा ऋणात्मक ३ करोड ७१ लाख रुपैयाँ रहेको छ।

मानुषी लघुवित्त वित्तीय संस्था लिमिटेडको संस्थापक सेयर बिक्रीमा राखिएको छ । संस्थाको सेयरधनीहरुको स्वामित्वमा रहेको संस्थापक सेयर आजदेखि बिक्रीमा राखिएको हो ।

यो सेयर खरिद गर्नका लागि संस्थाका विद्यमान संस्थापक सेयरधनीहरुले मात्रै आवेदन दिन सक्नेछन् । संस्थापक सेयरधनीहरुले सूचना प्रकाशित भएको ३५ दिनभित्र आवेदन दिनुपर्नेछ । यस्तो आवेदन बनेपामा रहेको कार्यालयमा लिखित आवेदन दिनु पर्नेछ ।

निर्धारित समयभित्र कुनै आवेदन नपरेमा अन्य व्यक्ति तथा कम्पनीलाई उक्त सेयर बिक्री गरिने छ ।