काठमाण्डौ । माबिलुङ इनर्जी लिमिटेडको प्रारम्भिक सार्वजनिक निष्कासन (आईपीओ) बाँडफाँड भएको छ । धितोपत्र बिक्री प्रबन्धक लक्ष्मी सनराइज क्यापिटल लिमिटेडको कार्यालयमा आज बिहान ९:३० बजे बाँडफाँड सम्पन्न भएको हो।

कम्पनीले गत साउन २६ गतेदेखि २९ गतेसम्म सर्वसाधारणका लागि आईपीओ निष्कासन गरेको थियो। लक्ष्मी सनराइज क्यापिटलका अनुसार कुल २२ लाख ५ हजार ८७१ आवेदकबाट २ करोड ४५ लाख १२ हजार ५३० कित्ता सेयरका लागि आवेदन परेको थियो।

यसमध्ये २१ लाख ९७ हजार ५८२ आवेदन सदर र ८ हजार २८९ आवेदन बदर भएका थिए। सदर आवेदकमध्ये २ करोड ४४ लाख १२ हजार १७० कित्ता सेयरका लागि खरिद आवेदन परेको थियो।

बाँडफाँडमा १ लाख २४ हजार ८९० जनाले प्रत्येकी १० कित्ताका दरले १२ लाख ४८ हजार ९ सय कित्ता सेयर प्राप्त गरेका छन्। बाँकी ४ कित्ता सेयर ४ जनाले १÷१ कित्ताका दरले पाएका छन्।

आईपीओको नतिजा मेरो सेयर र सीडिएस एण्ड क्लियरिङको वेबसाइटमार्फत हेर्न सकिनेछ।

माबिलुङ इनर्जीले सर्वसाधारणका लागि जारी पूँजीको ४८.९९९८ प्रतिशत अर्थात १५ लाख ४ हजार ७०६ कित्ता सेयर निष्कासन गरेको थियो। सो मध्ये १० प्रतिशत अर्थात १ लाख ५० हजार ४७१ कित्ता सेयर श्रम स्वीकृति प्राप्त गरेर विदेशमा रोजगारी गरिरहेका नेपालीहरूलाई गत असार २२ गतेदेखि साउन ४ गतेसम्म बिक्री गरिएको थियो।

सानिमा रिलायन्स लाइफ इन्स्योरेन्स कम्पनी लिटिमेडले करिब साढे १३ लाख कित्ता संस्थापक सेयर बिक्रीमा राखेको छ । कम्पनीले संस्थापक समूहतर्फको १३ लाख ४७ हजार ५८८ कित्ता सेयर आजदेखि बिक्रीमा राखेको हो ।  

यो सेयर खरिदका लागि जोसुकै व्यक्ति तथा कम्पनीले खरिद आवेदन दिन सक्नेछन् । यसअघि गत असार ३० गतेदेखि ३५ दिने सूचना जारी गरी कम्पनीका विद्यमान संस्थापक सेयरधनीहरुका लागि बिक्रीमा राखिएकोमा कुनै आवेदन प्राप्त नभएकाले आम सर्वसाधारणलाई सेयर बिक्री गर्न लागिएको कम्पनीले जनाएको छ ।  

यसर्थ सेयर खरिद गर्न इच्छुक लगानीकर्ताले सूचना प्रकाशित भएको १५ दिनभित्र काठमाण्डौको नक्सालमा रहेको कम्पनीको केन्द्रीय कार्यालयमा आवेदन दिनु पर्नेछ । 

क्रेस्ट माइक्रो लाइफ इन्स्योरेन्स कम्पनीको लक–इन अवधि आगामी असोज महिनामा समाप्त हुने भएको छ। कम्पनीले जारी गरेको कुल २२ लाख ५० हजार कित्ता सेयरमध्ये सामूहिक लगानी कोषका लागि छुट्टाइएको ५ प्रतिशत अर्थात १ लाख १२ हजार ५ सय कित्ता सेयरको लक–इन अवधि असोज ५ गते समाप्त हुने भएको हो।

सामूहिक लगानी कोषका लागि बाँडफाँड गरिएको सेयर बाँडफाँड मितिले ६ महिनासम्म लक–इनमा राख्नुपर्ने प्रावधानअनुसार असोजमा सो अवधिको समाप्ति हुने भएको हो।

कम्पनीले सर्वसाधारणका लागि २०८१ फागुन २२ गतेदेखि २६ गतेसम्म प्रतिकित्ता १०० रुपैयाँ दरका १८ लाख ४५ हजार कित्ता आईपीओ जारी गरेको थियो। उक्त आईपीओको बाँडफाँड २०८१ चैत ५ गते भएको थियो।