सिद्धार्थ प्रिमियर इन्स्योरेन्स लिमीटेडले लाभांश घोषणा गरेको छ ।
कम्पनीको माघ २१ गते आइतबार अपरान्ह ४ बजे बसेको सञ्चालक समितिको बैठकले आर्थिक वर्ष २०७९-८० को सञ्चित मुनाफाबाट चुक्तापूँजीको ११ प्रतिशत लाभांश वितरणको प्रस्ताव गरेको हो ।

प्रस्तावित लाभांशमा सबै नगद लाभांश(कर प्रयोजनसहित) रहेको छ ।

कम्पनीको चुक्तापूँजी २ अर्ब ८० करोड ६५ लाख रुपैयाँ रहेको छ । यो हिसाबले ३० करोड ८७ लाख २० हजार रुपैयाँ बराबरको नगद लाभांश वितरणको निर्णय भएको हो ।

नगद लाभांशको प्रस्तावसहित कम्पनीले आर्थिक वर्ष २०७९-८० को वित्तीय विवरण स्वीकृतिका लागि नेपाल बीमा प्राधिकरणमा पेश गर्ने निर्णय समेत गरेको छ ।

प्राधिकरणबाट स्वीकृत भई कम्पनीको आगामी वार्षिक साधारणसभाबाट पारित भएपछि घोषित लाभांश सेयरधनीले पाउनेछन् ।

चिलिमे हाईड्रोपावर कम्पनी लिमिटेडको आम्दानी घट्दा मुनाफा पनी घट्न गएको छ । कम्पनीले चालु आर्थिक वर्षको दोस्रो त्रैमाससम्म विद्युत बिक्रीबाट ६१ करोड २० लाख रुपैयाँ आर्जन गरेको छ । जुन अघिल्लो आवको दोस्रो त्रैमासको तुलनामा ३.८५ प्रतिशतले कम हो ।

अघिल्लो आवमा कम्पनीले विद्युत बिक्रीबाट ६२ करोड ४८ लाख रुपैयाँ आर्जन गरेको थियो ।

कम्पनीको वित्त आय १०.१५ प्रतिशतले घट्दै ८ करोड २० लाख रुपैयाँ मात्र भएको छ । आम्दानी घट्दा कम्पनीको मुनाफा समेत घटेको छ । समीक्षा अवधिसम्म कम्पनीले ३७ करोड ९१ लाख रुपैयाँ खुद नाफा कमाएको छ । जुन अघिल्लो आवको ४० करोड १२ लाख रुपैयाँको तुलनामा ५.५० प्रतिशतले कम हो । कम्पनीको सञ्चित नाफा १५.४९ प्रतिशतले घट्दै २ अर्ब ५३ करोड भएको छ ।

गत आवको यसै अवधिको तुलनामा कम्पनीको बैंक मौज्जाद न्यून हुँदा र ब्याजदरमा पनि कमी आएकाले कम्पनीको ब्याज आम्दानी १ करोड ६४ लाख अर्थात १६.६९ प्रतिशतले घटेको छ ।

मिर्मिरे लघुवित्त वित्तीय संस्था लिमिटेडले वार्षिक साधारण सभा डाकेको छ। संस्थाको माघ २१ गते बसेको सञ्चालक समितिको बैठकले संस्थाको १३ औं वार्षिक साधारण सभा डाकेको हो।

बैठकले आगामी फागुन १४ गते सोमबारका दिन काभ्रे जिल्लाको धुलिखेलमा रहेको होटल सारथीमा बिहान ११ बजे सभा आयोजना गर्ने निर्णय गरेको हो। उक्त सभामा संस्थापक सेयर सर्वसाधारणमा परिणत गर्ने विेशष प्रस्ताव पारित गरिनेछ ।

सभामा सञ्चालक समितिको तर्फबाट अध्यक्षद्वारा प्रस्तुत हुने आर्थिक वर्ष २०७९/८० को वार्षिक प्रतिवेदनमाथि छलफल गरी पारित गरिनेछ। यस्तै लेखापरीक्षकको प्रतिवेदन सहित २०८० असार मसान्तको वासलात, नाफा नोक्सान हिसाब, नगद प्रवाह विवरण लगायतका अनुसूचीहरु स्वीकृत गर्ने तथा आ।व २०८०/८१ को लेखापरीक्षणका लागि लेखापरीक्षकको नियुक्ती तथा निजको पारिश्रमिक निर्धारण गर्ने प्रस्ताव समेत पारित गरिनेछ।

यस्तै संस्थागत समूहका ४ जना र सर्वसाधारण समूहको २ जना सञ्चालको निर्वाचन गर्ने प्रस्ताव पारित गरिनेछ ।

वार्षिक साधारण सभा प्रयोजनका लागि संस्थाले आगामी फागुन ४ गते गते एक दिनका लागि बुक क्लोज गर्ने निर्णय गरेको छ ।

पूर्व सांसद तथा सिभिल बैंकका तत्कालीन अध्यक्ष इच्छाराज तामाङलाई सिभिल सहकारी ठगी प्रकरणमा ३ वर्ष कैद र १ अर्ब ७२ करोड जरीवाना भएको छ ।
विशेष अदालतले आइतबार तामाङमाथि कैद सजाय र जरीवाना सुनाएको हो ।

विशेष अदालतका अध्यक्ष टेकनारायण कुँव, सदस्यहरु तेजनारायण सिंह(राई) र मुरारीबाबु श्रेष्ठको इजलासले गत माघ ७ गते कसुर ठहर भएका तामाङलाई तीन वर्ष कैदको सजाय सुनाएको हो ।

इजलासले प्रतिवादी बिगो रकम १ अर्ब ७२ करोड ४४ लाख ५९ हजार ९७ रुपैयाँ समेत कायम गरिदिएको छ ।

अदालतले इच्छाराजकी श्रीमती सिर्जना शाक्यलाई समेत १ अर्ब ३ करोड ५४ लाख ४३ हजार ४८७ बिगो भराउन आदेश दिएको छ । शाक्यलाई १ वर्ष ६ महिनाको कैद सजाय पनि सुनाएको छ ।

सोही प्रकरणका अर्का प्रतिवादी सिभिल सहकारीका अध्यक्ष केशवलाल श्रेष्ठलाई पनि १ वर्ष ६ महिना कैद सजाय तथा २५ करोड ६५ लाख ८६ हजार १२४ रुपैयाँ बिगो भराउने फैसला सुनाइएको छ ।

विशेष अदालतले इच्छाराज तामाङ र सिर्जना शाक्यले छोरीहरु प्रतीक्षा तामाङ र प्रतिष्ठा तामाङको नाममा लुकाएको सम्पत्ति तथा प्रतिवादी केशवलाल श्रेष्ठको श्रीमती मीना श्रेष्ठको नाममा राखिएको सम्पत्तिसमेत जफत हुने फैसला सुनाएको छ ।