काठमाडौं। निरन्तर ओरालो लागिरहेको सेयर बजार, लगानीकर्तामा बढ्दो निराशा र बजारप्रतिको कमजोर बन्दै गएको विश्वास पुनःस्थापित गर्न नेपाल धितोपत्र बोर्ड (सेबोन)ले तयार पारेको करिब ११० पृष्ठ लामो ‘पूँजीबजार रेस्क्यू प्लान’ अर्थमन्त्री डा. स्वर्णिम वाग्लेबाट स्वीकृत भएको छ।
सेबोनका अध्यक्ष डा. गोपालप्रसाद भट्टका अनुसार बजारको तत्काल उद्धार, दीर्घकालीन सुधार तथा आधुनिकीकरणलाई लक्षित गर्दै तयार गरिएको विस्तृत कार्ययोजना अर्थमन्त्रीबाट स्वीकृत भइसकेको छ। उक्त योजनालाई अन्तिम रूप दिएर सार्वजनिक गर्ने तयारी भइरहेको उनले बताएका छन्।
‘हामीले तयार गरेको कार्ययोजना र एक्सन प्लान माननीय अर्थमन्त्रीज्यूबाट स्वीकृत भइसकेको छ,’ अध्यक्ष भट्टले भने, ‘यसलाई थप परिष्कृत गरेर भोलिसम्म सार्वजनिक गर्ने तयारीमा छौँ।’
अध्यक्ष भट्टका अनुसार रेस्क्यू प्लानमा आगामी एक वर्षभित्र पूँजीबजार सुधारका लागि आवश्यक कार्यहरू स्पष्ट समयसीमा र जिम्मेवारीसहित समेटिएका छन्। तत्काल कार्यान्वयन गर्नुपर्ने कार्यक्रमसँगै मध्यकालीन तथा दीर्घकालीन सुधारका योजना पनि दस्तावेजमा समावेश गरिएको छ।
योजनामा बजारमा देखिएका संरचनागत कमजोरी हटाउने, नियामकीय क्षमता सुदृढ बनाउने, कारोबार प्रणालीलाई आधुनिक बनाउने, लगानीकर्ता संरक्षणलाई प्रभावकारी बनाउने तथा बजारमा हुने सम्भावित विकृति र चलखेल नियन्त्रण गर्ने विषयलाई प्राथमिकतामा राखिएको छ।
अध्यक्ष भट्टले योजनाको प्रभावकारी कार्यान्वयनले हाल संकटग्रस्त अवस्थामा पुगेको पूँजीबजारलाई नयाँ गति दिने र लगानीकर्तामा गुमेको विश्वास पुनःस्थापित हुने विश्वास व्यक्त गरेका छन्।
लगानीकर्ताको दबाब बढ्दै
यसैबीच, बजारका समस्या तत्काल समाधान गर्न माग गर्दै आन्दोलनमा उत्रिएका सेयर लगानीकर्तालाई सेबोनले छलफलका लागि बोलाएको छ। आन्दोलनरत पक्षबाट तिलक कोइरालाको नेतृत्वमा छ सदस्यीय प्रतिनिधिमण्डल बोर्ड पुगेको छ भने अध्यक्ष भट्टसँग छलफलको तयारी भइरहेको छ।
लगानीकर्ताले आफ्ना सुझावसमेत समेटेर रेस्क्यू प्लान आजै सार्वजनिक गर्नुपर्ने माग राखेका छन्। योजना सार्वजनिक गर्न ढिलाइ भए बुधबारदेखि आन्दोलन थप सशक्त बनाउने उनीहरूको चेतावनी छ।
‘आजै रेस्क्यू प्लान सार्वजनिक भएन भने भोलिदेखि हाम्रो सशक्त आन्दोलन सुरु हुन्छ,’ लगानीकर्ता नेता तिलक कोइरालाले भने, ‘कुनै पनि ब्रोकर कार्यालय खोल्न दिँदैनौँ। आज साँझ ७ बजे भर्चुअल माध्यमबाट आन्दोलनका थप कार्यक्रम घोषणा गर्छौँ।’
