बैंकहरुले वैशाखमा पुनः ब्याजदर कटौती गर्ने भएपछि चैत मसान्तको चापलाई पनि उछिनेर सेयर बजारले फराकिलो फड्को मारेको छ। बुधबार बैंकर्स संघले नयाँ वर्षबाट निक्षेपको ब्याजदर घटाउने निर्णय गरेको थियो ।
बैंकर बैठककै चरणमा हुँदा बजार बढ्न सुरु गरिसकेको थियो। निर्णय सार्वजनिक भएपछि बजारको वृद्ध झनै तीव्र रह्यो। जानकारहरु पनि बजार माथि धकेलिनुमा ब्याजदरले प्रमुख भूमिका खेलेको बताइरहेका छन ।
बैंकरले मुद्दतीको मात्रै नभएर बचत, कल खाता र संस्थागत निक्षेपको पनि ब्याजदर घटाएका हुन्। मुद्दती ९.९९ मा झरेको छ। यसले बैंकहरुको लागत सस्तिएर कर्जाको ब्याज पनि घट्छ।बुधबार सेयर बजारले ९२.२२ अंकले बढेर १९६३.५५ को विन्दुमा उक्लिएको छ। गत असार १२ यता यति फराकिलो अन्तरले बजार बढेको थिएन। सूचक अप्रिल सुरु भएयताकै उच्चतम विन्दुमा कायम छ। नभए अप्रिल लागेपछि बजार १९ सयभन्दा तल नै खेलिरहेको थियो। तेस्रो त्रैमास पनि नजिँकिदा बजारमा ब्याज भुक्तानी लगायतले दबाब बनाइरहेको अवस्था थियो।
तर, सोमबारदेखि भने बजारले हरियाली कायम गरिरहेको छ। निजी क्षेत्रलाई आश्वासन दिँदै प्रधानमन्त्री र अर्थमन्त्रीले ब्याजदर निश्चित रुपमा घटाउने भनेपछि सेयर लगानीकर्ताको मनोबल उचालिएको थियो। न्यूनतम साझा कार्यक्रममा पनि सरकारले ब्याजदर बारे गम्भीर टिप्पणी गरेको हो।त्यसअघि भने नयाँ अर्थमन्त्रीका रुपमा डा. प्रकाशशरण महतले उद्यमी, व्यवसायी, लगानीकर्ता, नियामक लगायतसँग भेटेर मनोबल बढाउन खोजे पनि त्यसलाई नपत्याइँदा बजार ओरालो लागिरहेको थियो। अर्थमन्त्रीबाट विष्णुप्रसाद पौडेल बाहिएर पछि बजार निरन्तर घट्दो छ।
तर ब्याजदर घटाउन प्रधानमन्त्री, अर्थमन्त्री र गभर्नरको संयुक्त पहल अघि बढेपछि बजार बढ्न थालेको हो। पौडेल बाहिरिएपछि अर्थमन्त्रालय र राष्ट्र बैंकको सम्बन्धमा लगानीकर्ताको संशय बढ्दा मनोबल खुम्चिएको अवस्था छ ।
तर, सोमबार निजी क्षेत्र, प्रधानमन्त्री, अर्थमन्त्री र गभर्नरसँगै एकै बैठकमा थिए। जहाँ ब्याजदर घटाउने विषयमा सबैले पहल गरेका हुन्। र गभर्नर पनि यसका सकारात्मक थिए। जस लगत्तै बजारमा वृद्धि अनुभव गरिएको थियो।
ब्याजदर घट्ने भएपछी लगानिकर्ताको मनोबल बढेको अवस्था छ , त्यसैले बजार उकालो लागेको छ ।
