झापा इनर्जी लिमिटेडले आयोजना प्रभावित क्षेत्रका स्थानिय बासिन्दा तथा वैदेशिक रोजगारीमा रहेका नेपालीका लागि जारी गरेको आईपीओ बाँडफाँड भएको छ । धितोपत्र निष्कासन तथा बिक्री प्रबन्धक हिमालयन क्यापिटलले उक्त आईपीओ भदौ ९ गते बाँडफाँड गरेको हो ।
निष्कासन अवधिभर रितपूर्वक आवेदन दिएकाहरुलाई उक्त आईपीओ बाँडफाँड गरिएको क्यापिटलले जनाएको छ । आयोजना प्रभावित क्षेत्रका बासिन्दाका लागि जारी निष्कासन गरिएको सेयर बाँडफाँडमा परेका आवेदकहरुको विवरण हिमालयन क्यापिटलको वेबसाइटबाट हेर्न सकिनेछ । यस्तै वैदेशिक रोजगारीमा रहेका नेपालीहरुको बाँडफाँडमा परेका आवेदकहरुको विवरण हिमालयन क्यापिटल वा सिडिएस एण्ड क्लियरिङको वेबसाइटबाट हेर्न सकिनेछ ।

कम्पनीले गत साउन १४ गतेदेखि आयोजना प्रभावित क्षेत्रका स्थानिय बासिन्दा र वैदेशिक रोजगारीमा रहेका नेपाली नागरिकहरुका लागि कुल ४ लाख ३७ हजार २१९ कित्ता आईपीओ जारी गरेको थियो ।

जसमध्ये आयोजनाको प्रत्यक्ष प्रभावित क्षेत्र अर्थात झापा जिल्लाको शिवसताक्षी नगरपालिका वडा नं. ४ मा सौर्य विद्युत आयोजना निर्माण र संचालन भई रहेको स्थल र आयोजना क्षेत्रबाट १०० मिटर वरपरको क्षेत्रका बासिन्दाका लागि १ लाख ९० हजार ९५ कित्ता र आयोजनाको अप्रत्यक्ष प्रभावित क्षेत्र अर्थात झापा जिल्लाको शिवसताक्षी नगरपालिका वडा नं. ४ (आयोजनाको प्रत्यक्ष प्रभावित क्षेत्र झापा जिल्लाको शिवसताक्षी नगरपालिका वडा नं. ४ मा सौर्य विद्युत आयोजना निर्माण र संचालन भई रहेको स्थल र आयोजना क्षेत्रबाट १०० मिटर वरपरको क्षेत्र बाहेकको)बासिन्दाका लागि १ लाख ९० हजार ९५ कित्ता र नेपाल सरकारको सम्वन्धित निकायबाट श्रम स्वीकृति प्राप्त गरी वैदेशिक रोजगारीमा रहेका नेपालीहरुको लागि ५७ हजार २९ कित्ता आईपीओ जारी गरिएको थियो ।

अमेरिकी उद्योगपति एलन मस्कका दुई कम्पनीले एप्पल र ओपनएआईविरुद्ध आधिकारिक रूपमा मुद्दा दायर गरेका छन्। मस्कका कम्पनीहरूले दायर गरेको मुद्दामा एप्पल र ओपनएआईले सम्भावित प्रतिस्पर्धीहरूलाई रोक्न अवैध गठबन्धन गरेको आरोप लगाइएको छ।

मस्कको स्वामित्वमा रहेका कम्पनीहरू एक्स र एक्स एआई ले अमेरिकामा दायर गरेको मुद्दामा एप्पलले आफ्नो अपरेटिङ सिस्टममा ओपनएआईको च्याटबट समावेश गर्ने निर्णय प्रतिस्पर्धा विरोधी कदम भएको दाबी गरिएको छ। एक्सले यस कदमलाई प्रतिष्पर्धा नियमको उल्लंघन भएको आरोप लगाएको छ।

यसअघि पनि मस्कले सार्वजनिक रूपमा एप्पल र ओपनएआईप्रति असन्तुष्टि जनाउँदै गुनासो गरेका थिए। उनले एप्पलले आफ्नो एप स्टोरमा ओपनएआईलाई कृत्रिम रूपमा उच्च स्थान दिने प्रयास गरिरहेको र यसले निष्पक्ष प्रतिस्पर्धा तोडफोड गरेको आरोप लगाएका थिए।

यसबारेमा एप्पलले अहिलेसम्म कुनै आधिकारिक प्रतिक्रिया दिएको छैन।

स्थानिय बजारमा आज सुनको घटेको छ । अघिल्लो दिनको तुलनामा आज सुनको मूल्य तोलामा ३ सय रुपैयाँले घटेको छ ।

नेपाल सुनचाँदी व्यवसायी महासंघका अनुसार आज सुनको मूल्य प्रतितोला १ लाख ९७ हजार २ सय रुपैयाँ कायम भएको छ । अघिल्लो दिन भने सुनको कारोबार प्रतितोला १ लाख ९७ हजार ५ सय रुपैयाँमा भएको थियो । उक्त दिन सुनको मूल्य २३ सय रुपैयाँले बढेको थियो ।  

यस्तै आज चाँदीको मूल्य भने बढेको छ । चाँदीको मूल्य आज ५ रुपैयाँले बढ्दै प्रतितोला २ हजार ३५५ रुपैयाँ कायम भएको छ । 

काठमाडौं । नेपाल राष्ट्र बैंकले लघुवित्त वित्तीय संस्थाहरुलाई लक्षित गर्दै लाभांश वितरणसम्बन्धी नयाँ सर्कुलर जारी गरेको छ।

सर्कुलरअनुसार १५ प्रतिशतभन्दा बढी निष्क्रिय कर्जा (एनपीएल) भएका लघुवित्त वित्तीय संस्थाहरुलाई लाभांश वितरण गर्न प्रतिबन्ध लगाइएको छ। यसअघि लाभांश घोषणा गर्दा १५ प्रतिशतभन्दा माथि प्रस्ताव भएमा सो रकमको ५० प्रतिशत सामान्य जगेडा कोषमा राख्नुपर्ने व्यवस्था थियो।

नयाँ प्रावधानअनुसार लघुवित्त संस्थाले लाभांश वितरण गर्दा पछिल्लो असार मसान्तको एनपीएल र वितरणपछिको पुँजीकोष अनुपातलाई आधार मान्नुपर्नेछ।

पुँजीकोष १२ प्रतिशतभन्दा बढी हुने संस्थाहरु

• ५% एनपीएलसम्म भएमा २५% लाभांश वितरण गर्न पाउने
• ५–१०% एनपीएल भएमा २०%
• १०–१५% एनपीएल भएमा १५%

पुँजीकोष १०–१२% हुने संस्थाहरु

• ५% भन्दा कम एनपीएल भएमा २०%
• ५–१०% एनपीएल भएमा १५%
• १०–१५% एनपीएल भएमा १०%

पुँजीकोष ८–१०% हुने संस्थाहरु

• ५% एनपीएलसम्म भएमा १५%
• ५–१०% एनपीएल भएमा १०%
• १०–१५% एनपीएलभन्दा बढी भएमा ५% मात्र

यसका साथै, चुक्ता पुँजी कायम गर्न नसकेका लघुवित्त संस्थाहरुले बोनस शेयरबाहेक नगद लाभांश वितरण गर्न नपाउने व्यवस्था गरिएको छ।

राष्ट्र बैंकले खुद्रा कर्जा कारोबार गर्ने लघुवित्त वित्तीय संस्थाका लागि वैदेशिक रोजगारमा जाने व्यक्तिलाई रु. ३ लाखसम्म र महिलाका हकमा रु. ५ लाखसम्म धितो वा बिना धितो ऋण उपलब्ध गराउन सक्ने सीमा कायम गरेको छ।

नयाँ सर्कुलरले लघुवित्त संस्थाहरुको वित्तीय अनुशासन कडाइ गर्ने र लगानीकर्ताको हित संरक्षण गर्ने उद्देश्य राखेको राष्ट्र बैंकले जनाएको छ।

काठमाण्डौ । पिपुल्स पावर लिमिटेडले करिब ४ लाख अवितरित हकप्रद सेयर लिलामीमार्फत बिक्री गर्ने भएको छ। कम्पनीले गत असार २२ गतेदेखि साउन २६ गतेसम्म १ः०.५० अनुपातमा निष्कासन गरेको हकप्रदमा आवेदन नपरेका ३ लाख ९१ हजार ७७९ कित्ता सेयर बिक्रीमा ल्याउने तयारी गरेको हो।

कम्पनीका अनुसार भदौ १५ गतेदेखि उक्त सेयरहरुको बिक्री आवेदन खुला हुनेछ। यो सेयर खरिदका लागि जो कोही व्यक्ति, कम्पनी वा संघ–संस्थाले आवेदन दिन सक्नेछन्। सेयरको न्यूनतम मूल्य प्रतिकित्ता १०० रुपैयाँ तोकिएको छ। आवेदन दिन चाहनेले न्यूनतम १०० कित्ता र अधिकतम सम्पूर्ण कित्तासम्म बोलपत्र पेश गर्न सक्ने व्यवस्था गरिएको छ।

लगानीकर्ताले प्रभु क्यापिटलको कमलादीस्थित कार्यालय तथा प्रभु बैंकका विराटनगर, वीरगञ्ज, हेटौँडा, पोखरा, बुटवल, सुर्खेत र धनगढी शाखा कार्यालयहरुमा पुगेर आवेदन दिन सक्नेछन्।

उक्त लिलामी सेयर खरिदका लागि आवेदन भदौ २२ गतेसम्म मात्र स्वीकार गरिने कम्पनीले जनाएको छ।