नेपाल एसबीआई मर्चेण्ट बैंकिङ लिमिटेडले दशौं वार्षिक साधारण सभा आह्वान गरेको छ। असोज ५ गते बसेको सञ्चालक समितिको बैठकले असोज २७ गते बिहान ११ बजे काठमाण्डौको कमलादीस्थित प्रधान कार्यालयमा सभा बोलाउने निर्णय गरेको हो।

सभामा सञ्चालक समितिले प्रस्ताव गरेअनुसार सेयरधनीलाई चुक्तापूँजीको २५ प्रतिशतका दरले नगद लाभांश वितरण गर्ने प्रस्ताव पारित गरिनेछ। साथै, २०८१/८२ आर्थिक वर्षको वार्षिक प्रतिवेदनमाथि छलफल गरी अनुमोदन गर्ने तयारी छ।

त्यसैगरी, २०८१/८२ को लेखापरीक्षण प्रतिवेदनसहित २०८२ असार मसान्तको वासलात, नाफा–नोक्सान हिसाब, नगद प्रवाह विवरणलगायतका वित्तीय विवरणमाथि छलफल गरी पारित गरिनेछ। आगामी आर्थिक वर्ष २०८२/८३ का लागि लेखापरीक्षक नियुक्ति तथा पारिश्रमिक निर्धारण गर्ने प्रस्ताव पनि सभामा पेस गरिने कम्पनीले जनाएको छ।

समता घरेलु लघुवित्त वित्तीय संस्थाले संस्थापक सेयरधनीको स्वामित्वमा रहेको १० हजार कित्ता संस्थापक सेयर बिक्रीमा राखेको छ ।

यो सेयर खरिदका लागि विद्यमान संस्थापक सेयरधनीहरुले मात्रै खरिद आवेदन दिन सक्नेछन् । सेयर खरिद गर्न चाहने इच्छुक संस्थापक सेयरधनीहरुले सूचना प्रकाशित भएको ३५ दिनभित्र बनेपामा रहेको संस्थाको केन्द्रीय कार्यालयमा आईपुग्ने गरी आवेदन दिनु पर्नेछ ।

उक्त समयभित्र सेयर खरिदका लागि आवेदन नआएमा अन्य व्यक्ति तथा कम्पनीलाई बिक्री गर्ने प्रक्रिया अघि बढाइने संस्थाले जनाएको छ ।

नेपाली हिन्दूहरूको महान् पर्व बडादशैं आजबाट औपचारिक रूपमा सुरू भएको छ।
आश्विन शुक्ल पक्ष प्रतिपदाका दिन बिहान घर–घरमा जौ, मकै, गहुँ आदिको जमरा राखी घटस्थापना गरेसँगै यस वर्षको दशैं आरम्भ भएको हो।

नेपाल पञ्चांग निर्णायक समितिले घटस्थापनाका लागि बिहान ९ बजेर १३ मिनेटको शुभसाइत तोकेको थियो।

घटस्थापनाको परम्परा

दशैंको पहिलो दिन पूजाकोठा, दशैंघर वा कोतमा दियो, कलश र गणेश थापी नवदुर्गाको स्थापना गर्ने चलन छ।
कतैकतै ब्रह्माको समेत स्थापना गरिन्छ। कलशमा नदी, खोला वा बगरबाट ल्याइएको चोखो बालुवा वा माटो राखेर वरिपरि गाईको गोबर लेपेर त्यसमाथि जौ छर्ने र जमरा उमार्ने परम्परा रहेको छ।
जमराबाट देवीप्रतिको श्रद्धा र असत्यमाथि सत्यको विजयको प्रतीक मानिन्छ।

सार्वजनिक बिदा र संस्थाहरू बन्द

घटस्थापनाको अवसरमा सरकारले आज सार्वजनिक बिदा दिएको छ।
यस कारण आज देशभरका सरकारी कार्यालय, शैक्षिक संस्था, बैंक तथा वित्तीय संस्था बन्द छन्।

नेपाल स्टक एक्सचेञ्ज (नेप्से) समेत आज बन्द रहने भएकाले दोस्रो बजारमा सेयर कारोबार हुनेछैन।

सांस्कृतिक महत्व

बडादशैंलाई असत्यमाथि सत्यको विजयको प्रतीकका रूपमा मनाइन्छ। आश्विन शुक्ल प्रतिपदादेखि पूर्णिमासम्म चल्ने यो पर्वमा नवरात्रभरी देवी दुर्गाको पूजा–अर्चना गरिन्छ र दसौँ दिन विजया दशमीका दिन टीका–जमरा लगाइने चलन छ।

यसरी आज घटस्थापनासँगै देशभर उत्साहपूर्वक दशैंको माहोल सुरु भएको छ।

सानिमा बैंक लिमिटेडले लाभांश घोषणा गरेको छ । असोज ३ गते बसेको कम्पनीको सञ्चालक समितिको बैठकले गत आवका लागि सेयरधनीहरुलाई लाभांश दिने घोषणा गरेको हो ।

बैठकले आव २०८१/८२ को सञ्चित मुनाफाबाट ७.३६८५ प्रतिशत नगद लाभांश(कर समेत) प्रदान गर्ने निर्णय गरेको छ ।

बैंकको हालको चुक्तापूँजी १३ अर्ब ५८ करोड १५ लाख रुपैयाँ रहेको छ । प्रस्तावित लाभांश नेपाल राष्ट्र बैंकबाट स्वीकृत भएपश्चात बैंकको आगामी साधारण सभाबाट अुनमोदन गरी वितरण गरिनेछ ।

ईदी हाईड्रोपावर कम्पनी लिमिटेडले सर्वसाधारणलाई साधारण शेयर (आईपीओ) जारी गर्ने प्रस्ताव पारित गर्न वार्षिक साधारण सभा आह्वान गरेको छ। कम्पनीको सञ्चालक समितिको असोज ४ गते बसेको बैठकले असोज ३० गते बिहान ११ बजे पोखरास्थित रजिष्टर्ड कार्यालयमा सभा गर्ने निर्णय गरेको हो।

सभामा विशेष प्रस्तावमार्फत सर्वसाधारणलाई आईपीओ जारी गर्ने प्रस्ताव अनुमोदन गरिनेछ। साथै, आईपीओ निष्कासनका क्रममा नियामक निकायबाट आवश्यक परेमा कम्पनीको प्रबन्धपत्र तथा नियमावली संशोधन गर्ने अधिकार सञ्चालक समितिलाई प्रदान गर्ने विषयमा समेत छलफल हुनेछ।

त्यसैगरी, अधिकृत, जारी र चुक्तापूँजी वृद्धि गर्ने, कम्पनीको नाम परिवर्तन गर्ने तथा सम्पर्क कार्यालय खोल्ने प्रस्ताव पनि सभाले पारित गर्नेछ।

सभाले आर्थिक वर्ष २०८१/८२ को वार्षिक प्रतिवेदन, २०८२ असार मसान्तसम्मको वासलात, नाफा–नोक्सान हिसाब र नगद प्रवाह विवरण स्वीकृत गर्नेछ। साथै, आगामी कार्यकालका लागि सञ्चालक समितिको निर्वाचन गर्ने प्रस्ताव पनि प्रस्तुत गरिने कम्पनीले जनाएको छ।