काठमाडौं । आरएसडीसी लघुवित्त वित्तीय संस्था लिमिटेडले आर्थिक वर्ष २०८२/८३ को चौथो त्रैमाससम्म १३ करोड ८२ लाख ३८ हजार रुपैयाँ खुद नाफा आर्जन गरेको छ। यो अघिल्लो आर्थिक वर्षको सोही अवधिको १० करोड १८ लाख २३ हजार रुपैयाँको तुलनामा ३५.७६ प्रतिशतले बढी हो।
संस्थाले सार्वजनिक गरेको अपरिष्कृत वित्तीय विवरणअनुसार खुद सञ्चालन आम्दानीमा भएको वृद्धि तथा ५ करोड ५८ लाख रुपैयाँ बराबरको इम्पेयरमेन्ट चार्ज रिभर्सल भएपछि नाफामा उल्लेख्य सुधार आएको हो।
समीक्षा अवधिमा संस्थाको खुद सञ्चालन नाफा २५ करोड २७ लाख ५८ हजार रुपैयाँ पुगेको छ। अघिल्लो वर्ष सोही अवधिमा यस्तो नाफा २० करोड २० लाख ४४ हजार रुपैयाँ रहेको थियो।
यद्यपि, खुद ब्याज आम्दानी भने घटेको छ। अघिल्लो वर्ष २२ करोड ३६ लाख रुपैयाँ रहेको खुद ब्याज आम्दानी चालु आवमा १९ करोड १५ लाख ४२ हजार रुपैयाँमा सीमित भएको छ। सञ्चालन खर्च पनि ५ करोड ५० लाख रुपैयाँबाट बढेर ५ करोड ६२ लाख रुपैयाँ पुगेको छ।
संस्थाको वितरणयोग्य मुनाफा ११ करोड ४१ लाख रुपैयाँ पुगेको छ भने लाभांश क्षमता १०.९७ प्रतिशत कायम भएको छ।
समीक्षा अवधिमा निष्क्रिय कर्जा (एनपीएल) कुल कर्जाको ३.९२ प्रतिशत पुगेको छ, जुन अघिल्लो वर्षको ३.३४ प्रतिशतभन्दा केही बढी हो। तर, कर्जा नोक्सानी व्यवस्था अनुपात ११६.७० प्रतिशत रहेकोले सम्भावित जोखिम व्यवस्थापनका लागि संस्थाको प्रबन्ध पर्याप्त रहेको देखिन्छ।
संस्थाले कस्ट अफ फण्ड ६.१७ प्रतिशतबाट घटाएर ४.८७ प्रतिशतमा झारेको छ। पूँजी कोष अनुपात २७.७२ प्रतिशत कायम रहेको छ।
चुक्तापुँजी १ अर्ब ३ करोड ४० लाख रुपैयाँ रहेको संस्थाको जगेडा कोष २० करोड ७१ लाख रुपैयाँ र सञ्चित मुनाफा ११ करोड ४१ लाख रुपैयाँ पुगेको छ।
समीक्षा अवधिसम्म संस्थाको कुल सम्पत्ति ५ अर्ब ६६ करोड ८४ लाख रुपैयाँमा सीमित भएको छ। अघिल्लो वर्ष सोही अवधिमा कुल सम्पत्ति ८ अर्ब १७ करोड ८९ लाख रुपैयाँ रहेको थियो।
प्रति सेयर आम्दानी (ईपीएस) १३.३७ रुपैयाँ पुगेको छ, जुन अघिल्लो वर्ष ९.८५ रुपैयाँ थियो। त्यसैगरी, प्रतिसेयर नेटवर्थ १३१.०७ रुपैयाँ, मूल्य–आम्दानी अनुपात (पीई रेसियो) ४८.६१ गुणा तथा तरलता अनुपात २८.१४ प्रतिशत कायम भएको संस्थाले जनाएको छ।
