काठमाडौं । नेपाल धितोपत्र बोर्ड (सेबोन)का अध्यक्ष डा. गोपालप्रसाद भट्टले ‘प्रि–आईपीओ’का नाममा हुने अवैध सेयर कारोबारमा संलग्न कम्पनी तथा व्यक्तिमाथि कडा कारबाही गरिने बताएका छन्।
बुधबार प्रतिनिधि सभाअन्तर्गत अर्थ समितिको बैठकमा सांसदहरूले उठाएका प्रश्नको जवाफ दिँदै अध्यक्ष भट्टले ‘प्रि–आईपीओ’ कारोबार नेपालको कानुनअनुसार वैधानिक नभएको स्पष्ट पारे। उनले राज्यले अवैध कारोबारलाई कुनै पनि अवस्थामा वैधानिकता दिन नसक्ने बताए।
‘प्रि–आईपीओ अवैध गतिविधि हो। यस्ता कारोबार कुनै पनि कानुनी प्रक्रियाअन्तर्गत हुँदैनन्। यदि यस्तो गतिविधि भएको जानकारी प्राप्त भयो भने सम्बन्धित कम्पनी वा व्यक्तिमाथि कानुनअनुसार कारबाही गर्छौं,’ उनले भने।
पछिल्लो समय केही कम्पनीहरूको नाम जोडेर ‘प्रि–आईपीओ’ कारोबार भइरहेको चर्चा सार्वजनिक भइरहेका बेला अध्यक्ष भट्टको यो धारणा आएको हो।
अध्यक्ष भट्टका अनुसार सेबोनले योग्य कम्पनीहरूको पुँजी बजारमा पहुँच विस्तार गर्न विभिन्न नीति तथा योजना अघि बढाएको छ। स्टार्टअप, साना तथा मध्यम उद्योग (SMEs) र अन्य योग्य कर्पोरेट संस्थाहरूलाई पुँजी बजारमार्फत वित्तीय स्रोत जुटाउने अवसर उपलब्ध गराउने व्यवस्था विकास भइरहेको उनले जानकारी दिए।
उनले आईपीओ जारी गर्न चाहने कम्पनीहरूले उच्च पारदर्शिता, कडा नियामकीय मापदण्ड तथा अन्तर्राष्ट्रिय अभ्यासअनुसारको सुशासन पूरा गर्नुपर्ने बताए।
सर्वसाधारण लगानीकर्ताको हित संरक्षणका लागि आईपीओको मूल्य निर्धारण प्रक्रियालाई अझ प्रतिस्पर्धी र पारदर्शी बनाइने पनि उनले बताए। यसका लागि नागरिक लगानी कोष, कर्मचारी सञ्चय कोषलगायत संस्थागत लगानीकर्ताको सहभागिता बढाएर बुक बिल्डिङ तथा मूल्य निर्धारण प्रणालीलाई थप प्रभावकारी बनाउने तयारी रहेको उनले जानकारी दिए।
भट्टले पुँजी बजारलाई केवल सेयर कारोबारमा सीमित नराखी ऋणपत्र (बन्ड), डेरिभेटिभ उपकरण तथा कमोडिटी फ्युचर्सजस्ता नयाँ वित्तीय साधनतर्फ विस्तार गर्ने योजनामा बोर्ड अगाडि बढिरहेको पनि बताए।
